Kvinna i 20-åra er i Sogn tingrett frifunnen etter at ho i oktober i fjor slo seg krakilsk i ambulansen.
Kort tid etter at ho vart observert dansande og glad på utestaden, kom ei dørvakt over henne livlaus på eit toalett.
Funne livlaus
I frykt for kvinna sin helsetilstand varsla utestaden ambulanse som kom til staden kort tid etter. I ambulansen vakna kvinna til og nekta å bli med til sjukehus.
Då ambulansepersonellet løyste henne frå båra og skulle la henne få gå, slo kvinna rundt seg og trefte mellom andre eine ambulansearbeidaren i magen.
Sjølv hugsa ikkje kvinna stort frå ho var på dansegolvet, til ho vakna på sjukehuset.
Kravde bot
I retten erkjende ho ikkje straffskuld, medan påtalemakta la ned påstand om 12.000 kroner i bot og sakskostnader.
Sjølv om verken forsvaret eller politiet kunne dokumentere eine eller andre vegen, kunne ikkje retten sjå vekk ifrå at kvinna hadde fått i seg noko anna enn alkohol den aktuelle kvelde.
Og at nokon kunne ha hatt narkotiske stoff i vinen hennar.
Tvilen kom til gode
Retten viste mellom anna til den dramatiske endringa på kort tid, samt at det er kjent at valdtektsdop som Rohypnol og GHB vert nytta i tettstaden. Symptoma til kvinna var også i samsvar med dette.
Basert på opplysningane i saka lét retten tvilen komme kvinna til gode og frifann henne for forholdet.