Før helga måtte politiet bruke store ressursar for å leite fram ein fengslingsplass til ein polsk vinningskriminell før dei fann plass i Bergen.
Påtaleansvarleg i Fjordane Politidistrikt, Knut Broberg, seier leitinga er blitt ein kjedeleg vane.
– Det er ganske vanskeleg. Vi må leite etter fengselsplassar kvar gong, seier Broberg.
Mange i soningskø
Politiet må drive detektivarbeid for å finne fengselsplassar til kriminelle. Før helga brukte politiet mykje tid på å leite etter fengselsplass til ein polsk vinningskriminell som fekk fire veker varetekt.
På landsbasis står rundt 1200 personar i soningskø. Dermed blir det vanskeleg for politiet å finne fengselsplassar.
– I forhold til dei ressursane vi har, brukar vi for mykje på dette arbeidet. Vi bruker unødig mykje tid på å finne ein fengslingsplass og det er eit puslespel å frakte vedkommande der etterpå, seier han.
- LES OGSÅ:
Må ofte seie nei
Dagleg leiar ved Vik fengsel, Roy Egil Stadheim seier dei ikkje klarer å stille varetektsplassar til disposisjon i den grad dei ønskjer.
– Det blir ofte eit puslespel å få dette til, seier han.
I Vik har dei 39 fengselsplassar etter at dei i 2008 fekk utvida med 11 opne plassar, men det er framleis ikkje nok.
– Vi får spørsmål fleire gonger i veka. Nokre klarer vi å ta imot, medan andre må vi seie nei til. Det skjer relativt ofte at vi må seie nei til varetektsplassar.
- LES OGSÅ:
Vil redusere køane
Statssekretær i Justisdepartementet, Kristin Bergersen, seier regjeringa har føreslått to konkrete tiltak for å redusere soningskøane.
– I budsjettet for 2014 er det forslag om å auke bruken av elektronisk kontroll, såkalla fotlenke. Dette skal bli ei landsdekkjande tilbod. Vi skal også innføre bøteteneste. Det vil seie ei form for samfunnsteneste i staden for at du tek opp ein fengselsplass. Dette vil frigjere ein del fengselsplassar for dei som treng det.