Eid-ordførar blir skulda for dobbeltmoral av sine eigne

Eid-ordførar Sonja Edvardsen (Ap) blir kritisert kraftig for å ha stemt for regjeringa sin sjukehuspolitikk då ho møtte som vararepresentant i Stortinget.

Styreleiar i Helse Førde og Ap-politikar Clara Øberg meiner partikollega Sonja Edvardsen driv med dobbeltmoral.

Eid-ordføraren er ein av landets fremste sjukehusforkjemparar og har gått imot sitt eige parti i den betente sjukehusstriden. Men då ho møtte i Stortinget støtta ho regjeringa sitt syn i saka.

• LES OGSÅ: Eid-ordførar stemde for nedbygging av sjukehus i Stortinget

Stortingsrepresentant Bjørn Lødemel (H) godtok også sjukehusnedbygging, sjølv om har har gått høgt ut og sagt at han vil ha fullverdige lokalsjukehus.

Skulda for dobbeltmoral

Clara Øberg rasar no mot partikollegaen, og skuldar ho for dobbeltmoral. For Edvardsen og Eid Arbeiderparti gjekk høgt på bana for å få Øberg og styremedlem Harry Mowatt ekskludert frå partiet fordi dei gjekk inn for nedlegging av føde- og akuttfunksjonar ved lokalsjukehusa i Eid og Lærdal.

– Ho har eit stort forklaringsproblem. Det er ikkje lenge sidan Eid Arbeiderparti med Edvardsen i spissen, gjekk inn for å ekskludere med og Harry Mowatt frå partiet på grunn av vår handtering i sjukehussaka, seier Øberg til NRK.no.

Øberg og Mowatt vart begge vraka frå fylkestingslista til Sogn og Fjordane Arbeiderparti på grunn av sjukehussaka.

– Og no stemmer Edvardsen for det same som vi har gjort i Helse Førde-styret. Dette er absolutt dobbeltmoral, seier Øberg.

NRK.no har også snakka med Harry Mowatt. Også han meiner Edvardsen driv med dobbeltmoral.

(Artikkelen held fram under biletet)

Edvardsen slår tilbake

Edvardsen finn seg ikkje i kritikken frå partikollega Øberg. Ho meier kritikken er svært urimeleg.

– Dette direkte feil av Øberg, for alle veit kvar eg står i denne saka. Clara Øberg veit at i Stortinget må ein røyste med stortingsgruppa, seier Edvardsen til NRK.no.

– Men står ikkje du fritt til å stemme det du sjølv føler for?

– Nei, dessverre får ein ikkje det. I Stortinget fekk eg ikkje noko val, og eg måtte røyste som eg gjorde. Men både stortingsgruppa og statsråden er godt kjende med at eg er usamde med dei i denne saka, svarer ho.

Edvardsen møtte som vararepresentant i Stortinget torsdag. Kristleg Folkeparti (KrF) og Framstegspartiet (Frp) la fram forslag om å fryse dei pågåande omstillingsprosessane ved lokalsjukehusa inntil den nasjonale helseplanen er klar.

Då stortingsrepresentantane skulle stemme over forslaget, valde Edvardsen å støtte regjeringa sitt standpunkt i saka. Fleire var på talarstolen og debatten gjekk høgt, men Edvardsen tok ikkje ordet sjølv om ho er ordførar i kommunen som blir hardast råka av regjeringa sitt sjukehusvedtak.

Leiar i Eid Arbeiderparti, Siri Sandvik, meiner Edvardsen burde stemt annleis i Stortinget.

– Det er uheldig at ordføraren i Eid i Sogn og Fjordane, Sonja Edvardsen, har røysta for kraftige kutt ved sitt eige lokalsjukehus. Ho burde røysta mot nedbygging då ho møtte som vararepresentant i Stortinget, seier Sandvik.

Fylkesleiaren støttar Edvardsen

Fylkesleiar i Arbeidarpartiet i Sogn og Fjordane, Nils P. Støyva, ser på si side ingen grunn til å kritisere Edvardsen for det ho gjorde i Stortinget.

– Dette var eit forslag frå KrF og Frp som regjeringspartia og Høgre røysta samla imot, og då må Edvarden følgje regjeringspartia i denne saka. Slik er systemet, seier Støyva.

– Men når det gjeld datalagringsdirektivet nyleg gjekk fleire Høgre-representantar mot si eiga stortingsgruppe. Burde ikkje Edvardsen også gått imot sitt eige parti dersom ho faktisk var usamde med dei?

– Eg vil ikkje uttale meg om Høgre, men for regjeringspartia er det slik at ein røystar samla i denne type saker. Her er det ingen grunn til å kritisere Edvardsen, seier Støyva.

– Inga stor sak

Støyva legg ikkje skjul på at han har lite til overs for kritikken frå Øberg.

– Det er intern Ap-strid mellom Edvardsen og øberg i denne saka. Kor uheldig er dette for Arbeidarpartiet?

– Dette er ingen strid og inga stor sak, seier Støyva.