Samla 3312 underskrifter for føden

For litt over to veker sidan starta underskriftskampanjen «Forsvar føden i Lærdal» - og i går kunne kampanjeleiar Linda Kvam Bjørkum presentere resultatet: Heile 3312 personar har skrive under på sin støtte til fødestova.

- At ordføraren i vår eigen heimkommune gjekk ut i meda og ville gje frå seg føden, fekk begeret til å flyte heilt over. Vi måtte berre gjere noko for å få frustrasjon over i handling, seier Bjørkum.

• LES OGSÅ: Pipa har fått ein annan lyd

Reagerte på eigen ordførar

Kampanjeleiaren presenterte tala for underskriftsaksjonen under folkemøtet om Lærdal sjukehus måndag kveld.

• LES OGSÅ: Aksjonistar boikotta eigen ordførar

Til stor applaus frå salen konkluderte Bjørkum:

- Er ikkje dette bra, så veit ikkje eg!

Kampanjen starta som ein reaksjon på at Lærdal-ordførar Arne Sanden gjekk ut i media og gav opp den forsterka fødestova ved lokalsjukehuset i kommunen. Det innsamla talet signaturar enda over 1000 høgare enn talet på innbyggjarar i Lærdal kommune.

ARTIKKELEN HELD FRAM UNDER BILETET

Fryktar nedlegging av ortopedien

Arne Sanden var til stades på folkemøtet, og forsvarer framleis standpunktet sitt.

- Eg kunne sjølvsagt enkelt og greitt hatt fokus på mitt eige omdømme, der eg stod på barrikadane og skreik saman med alle andre. Men det som då hadde skjedd, er at ortopedien ved Lærdal sjukehus hadde blitt nedlagd, seier ordføraren.

• LES OGSÅ: Dette er aktørane i sjukehusstriden

- Har registrert stort engasjement

Informasjonssjef Arne Eithun i Helse Førde fekk i går lista med underskrifter. Han rosar engasjementet i saka, men kunne ikkje love noko som helst.

- Dette er ting vi tek med oss, seier han.

- Slik at underskriftskampanjen og meiningane her vil syne att i arbeidet framover?

- Kva styret konkluderer med til sjuande og sist - og ikkje minst kva Helse Vest kjem opp med i sin regionale fødselsplan - står att å sjå. Men eg trur nok at dei har registrert dette engasjementet, seier Eithun.

• SEI DI MEINING OM SJUKEHUSA!