Supporterunionen for britisk fotball vil at tilhengarar av engelske lag skal samle seg om ein fotballpub i Ålesund sentrum.
Der skal veggane dekorerast med supporterartiklar, og puben kan vise fire forskjellige kampar til ei kvar tid. Men så langt er det stort sett berre Liverpool-fansen som har reagert.
I puben i Ålesund sentrum skal alle vere velkomne uansett om det er Liverpool, Arsenal, Chelsea, Ipswich , Stoke eller andre engelske lag som er favoritten.
Supporterunionen for britisk fotball har eiga avdeling på Sunnmøre, og dei har tatt initiativet til å få til ein pub med eit sterkt fotballmiljø, der dekorasjonar på veggane høyrer med.
Pub for alle klubbar
To av entusiastane er Liverpool-tilhengarar, men dei vil at puben skal vere for alle.
- Det er viktig at mange klubbar blir representerte her slik at vi får litt intern motstand, seier Ronny Brunvoll.
Han ønskjer at Leeds, Tottenham og andre klubbar skal vere representert - det hadde vore heilt topp for alle.
- Tanken er at flest mogleg supporterar for engelsk fotball skal kunne samlast her, seier Bertil Holen. Her kan vi ha samlingar med quiz og andre sosiale aktivitetar.
Fotballpubar har det alltid vore, men ikkje ein som dette hevdar initiativtakarane.
- Ålesund har hatt fleire fotballpubar, men ikkje i ordets rette forstand, meiner Holen. Her kan du sjå fire kampar samtidig, veggane blir pryda av fotballdekorasjonar - og anna som gir tilhøyrigheit.