Hovudmannen bak terrorangrepa er død

– Det dreiar seg om eit lik som vart funne inne i leilegheita, gjennomhola av prosjektil, presiserer statsadvokaten, François Molins, i ein uttale torsdag.

Molins fortalde om aksjonen i ein pressekonferanse onsdag kveld, og understreka at den var svært krevjande. Fleire enn 5000 skot vart fyrte av, sa han.

Det er usikkert om Abaaoud sprengde seg sjølv eller om han vart skoten av politiet, ifølge den franske TV-kanalen BFM.

• Les også: Dette er Abdelhamid Abaaoud

Framleis minst ein på frifot

Abaaoud har vorte knytt til fleire forsøkte terrorangrep tidlegare og skal ha kjempa med IS i Syria. Terroreksperten Mathieu Guidère seier til BFM at Abaaouds død betyr at risikoen for fleire angrep på Frankrike er blitt mindre.

– Dette er ein stor lette for alle som jobbar med desse sakene, seier han.

Likevel åtvarar statsminister Valls mot å undervurdere trusselen, og understreka i ein tale til det franske parlamentet onsdag at det er godt mogleg at Abaaoud ikkje er den einaste «hjernen bak» angrepet.

Ein av terroristane, Salah Abdeslam, er også framleis på frifot. Franske styresmakter er no på tå hev, og rett etter Valls hadde tala godkjente parlamentet tre månaders unntakstilstand som president Hollande bad om i helga.

• Les også: Den åttende terroristen er på frifot

110 politimenn aksjonerte onsdag

Abaaoud var hovudmålet bak aksjonen mot ein bygning i forstaden til Paris, som varte i sju timar onsdag morgon, og førte til arrestasjonen av sju personar som skal vere mistenkte for å vere involvert i terrorangrepet.

To, mogleg tre, personar døydde i løpet av aksjonen. Ein av dei skal vere ei kvinne som utløyste eit sjølvmordsbelte, og no kjem det altså fram at den andre stadfesta omkomne skal vere Abaaoud. Kvinna skal ifølge tre politimenn vere kusina til Abaaoud, men dette er ikkje stadfesta.

Politiet gjekk til åtak på ein bygning i Saint Denis etter at etterretning hadde peika mot at den belgiske islamisten skulle vere der, og ikkje i Syria som ein tidlegare hadde trudd. Eit vitne skal ha sett han i Frankrike og aktivitet på telefon og bruk av bank stadfesta dette. Innanriksminister Bernard Cazeneuve stadfesta under ein pressekonferanse torsdag at franske myndigheiter ikkje hadde fått informasjon om at Abaaoud skulle vere i Europa i forkant av angrepa.

Bygningen skal vere ein av tre tilhaldsstader i Frankrike knytt til terroristane, mange av dei belgiske statsborgarar. Også tre bilar med belgiske skilt er knytte til angrepa, og bilane skal ha blitt observerte køyrande frå Belgia til Paris fredag før angrepa tok til.

• Les også: Her gøymde terroristane seg