– Eg håpar vi kan få etablert oss midt på tabellen denne sesongen. Men det handlar om å lære å krype og gå, for så å springe. Målet vårt blei jo nådd i fjor, då vi kom tilbake i det engelske ligasystemet.

Det seier AFC-Wimbledon-blodfan, Hans Petter Bakke, om forventningane til klubben som på ni sesongar har rykka opp fem divisjonar.

I dag er klubben klar for å spele sin første kamp i engelsk League Two.

– På «nikk og hei» med 200-300 mann

Bakke er ein av fleire som reiser til England for å oppleve noko litt annleis enn fans som dreg på Premier League-arenaene.

• LES OGSÅ: NRK-bloggar Arve Lote om å besøke underskogen av engelske ligaklubbar

Han er leiar i den norske AFC Wimbledon-supporterklubben, og dermed ein av mange nordmenn som held med eit lag i lågare divisjonar.

– Går ein på pub etter ein kamp i Premier League treff ein kanskje fire-fem mann før ein går heim og legg seg. Men i lågare divisjonar er ein på «nikk og hei» med nærare 2-300 mann, og gjerne veldig tett med 30-40 mann, seier Bakke.

(artikkelen held fram under biletet)

Krangla med trenaren om keeperval

Og det er nærheit til klubbane som gjer at fleire nordmenn har stor interesse for lag i lågare divisjonar, trur supporterleiaren for den norske Brentford-fansen, Robin Hesmyr.

– Ein møter alt frå formannen i klubben til fansen når ein er på tur. I fjor kom til dømes formannen og den gamle manageren i Brentford bort til oss før kamp, og ville helse bare fordi vi var nordmenn, seier Hesmyr.

Nokon gonger kan det kanskje bli vel nært mellom supporter og klubb.

– Eg krangla mykje med trenaren vi hadde for fire, fem år sidan fordi eg meinte han brukte feil keeper, seier AFC Wimbledon-fan Bakke humoristisk.

Vil komme nærare fansen

I League One-klubben Brentford satsar dei norske supporterane på å komme endå nærare fansen, og kanskje like nær klubbens nye manager Uwe Rösler som har lang bakgrunn frå norsk fotball.

– Når det var klart at Rösler fekk jobben var det mange som var nysgjerrige, og gjerne kanskje skeptiske sidan han bare hadde trenarerfaring frå Norge. Då måtte vi jo orientere litt om kven denne mannen er og har stått for i norsk eliteserie, seier Hesmyr.

Rundt 30 medlemmar brå den norske Brentford-supporterklubben brukar å samle seg til ein stor kamp i året, men reiser også ofte kvar for seg.

Hesmyr trur ikkje det er store forskjellane på ein nordmann som dreg til England bare for å sjå Premier League-fotball, og ein som følgjer eit bakgardslag på 3. eller 4. nivå.

– Folk er like lidenskaplege for klubben sin uansett kva nivå det er snakk om, seier han.

(artikkelen held fram under biletet)

Wimbledon-Jones: – For mange menn

At inntoget av normenn er stort i lågare divisjonar, blir også lagt merke til av engelskmennene.

Mark Jones, ein av initiativtakarane til stiftinga av AFC Wimbledon, seier at det no kjem så mykje nordmenn til England at dei må vurdere å gjere noko.

– Problemet er at det er bare menn som kjem. Vi bør innføre kvotering, og få kvinnene til å komme over frå Norge, seier Jones lattermildt til NRK.

Går på pub med spelarar og trenarar

På Wimbledons Kingsmeadow kjem Bristol Rovers til kamp laurdag. Bakke fortel at han allereie er på plass, mellom formenn og spelarar i den tradisjonsrike klubben.

Han er ikkje i tvil om at det er forskjell på norske supporterar i England.

– Her kjem ein så tett på kulturen og heile laget. Det er ikkje pengane som styrer som i den øvste divisjonen. Der må enkelte fans ta lån for å kjøpe sesongkort.

Bakke trekk fram den store graden av kompiskjensle i småklubbar.

– For min del, i Wimbledon, er det ikkje bare å henge med dei gode venene mine her, men også med spelarar og trenarar på pub etter kamp. Ein føler seg ikkje som ein fotballturist, men meir som ein del av heile kulturen, seier han.

– Vil gjerne ha fleire nordmenn med

Nordmannen, som har vore Wimbledon-supporter sidan 1985 og AFC Wimbledon-tilhengjar sidan klubben etablerte seg i protest mot flyttinga til Milton Keynes utanfor London, er klar for å få endå fleire nordmenn med i supporterklubben sin.

– Då vi spelte opprykksplayoff i fjor var vi fleire nordmenn på plass. Under straffekonkurransen gjekk vi heilt «bananas», og grein då det heile var avgjort til vår fordel.

– Det ville jo heilt klart vore moro om fleire blei med på sånne ting, seier Bakke, som sitrar av spenning før AFC Wimbledon går på banen til sin første kamp i det engelske ligasystemet.