Lovar kamp for alarmsentralen

Tysdag kveld vart det klart at Direktoratet for samfunnstryggleik (DSB) har vedteke å leggje ned 110-sentralen i Florø.

Omorganiseringa skal vere ferdig innan medio april 2013.

• LES OGSÅ: – Eg håpar folk ser galskapen

– Vedtaket blir påklaga, KS, kommunane, alarmsentralen og stortingsbenken har bede om møte med justisdepartementet for å få tatt opp denne saka, seier KS-leiar i Sogn og Fjordane, Jenny Følling.

Fekk inn 17 svar

Oslo politidistrikt fekk gjennom 22. juli-kommisjonen sin rapport kraftig kritikk for måten terroråtaka i Oslo og på Utøya vart handtert. Konklusjonen var at sentralen var for dårleg bemanna. I byrjinga av 2013 kom framlegget om å kutte ni av dagens 20 sentralar.

Argumentet er å få meir robuste sentralar som kan handtere større kriser. Mellom framlegga, som no også er vedteke, er å flytte alarmsentralen i Florø under Bergen.

– Vi har fått 17 svar i høyringsrunden, som vi har gått grundig igjennom på leit etter det vi meiner er vektig argumentasjon. Fordelane med å slå saman er vesentleg tyngre enn dei som er mot samanslåing, seier avdelingsdirektør Anne Rygh Pedersen i DSB.

– Første steg?

Stortingsbenken frå fjordfylket har tidlegare varsla at dei om naudsynt vil stille mannsterke på kontoret til justisministeren. Denne planen har også KS og alarmsentralen sjølv i Florø.

Følling fryktar at alarmsentralen berre er første steg mot ei nedbygging av beredskapen i fylket.

Ho viser til at politiet sin operasjonssentral og alarmsentralen ligg vegg i vegg og lett kan samordne seg ved større kriser. Også politidistriktet blir vurdert lagt ned.

– Alarmsentralen er viktig for fylket fordi det er ein del av den totale beredskapsressursen. Dei er lokalisert med politiet og lett kan samhandle ved større hendingar. Det gir ein meir samordna beredskap, seier ho.

Første av fleire

Stortingsrepresentant Ingrid Heggø (Ap), som er talsperson for stortingsbenken frå Sogn og Fjordane, deler denne frykta.

Ho viser til at det i Florø er samla eit cluster av godt fagleg beredskapsmiljø, der også 330-skvadronen og Florø radio er med.

• LES OGSÅ: Bergen tek gjerne over for Florø

– Plukkar ein først 110-sentralen, så ser ein at politidistriktet blir for svakt fordi dei ikkje vil ha noko miljø. Så tek dei vekk den byggjesteinen også. Då kan ein berre tenkje, kva blir det neste? 330-skvadronen, undrar ho.

Stor skilnad

– Kan de som stortingspolitikarar frå fylket sitje å sjå på at alarmsentralen blir lagt ned?

– Nei, vi kan ikkje det. Difor har vi bede om møte med justisministeren.

– Eg meiner vedtaket er feil. For det er ikkje teke omsyn til lokalkunnskap i det heile, og heller ikkje teke omsyn til at brannvesenet i Sogn og Fjordane er tufta på fri vilje. Det er det ikkje i Hordaland, held Heggø fram.

Overvurdert kunnskap

I DSB seier Rygh Pedersen at lokalkunnskap er overvurdert som argument.

– Det er betydeleg overdrive. I dag har vi teknologiske hjelpemiddel som erstattar veldig mykje av lokalkunnskapen. Dessutan, kunnskapen er ute i den lokale brann- og redningstenesta. Det er dei som rykkjer ut og skal hjelpe folk. Dei skal også vere der i framtida, seier ho.

Klagefrist 19. mars

Følling seier kommunane reagerer sterkt på det dei opplever som eit arrogant DSB og tempoet saka har hatt.

Fristen for å klage avgjerda inn for justisdepartementet er 19. mars. Dei kan overprøve vedtaket til DSB.

– Saka må opp på politisk nivå, så er det håp om at ein politisk kan vere med å gjere om vedtaket, seier Følling.

Ein eventuell omkamp om vedtaket passar DSB dårleg. Rygh Pedersen seier det hastar at justisministeren tek ei avgjerd i saka.

– Eit par veker etter påske bør avgjerda vere i boks for å halde framdrifta i utrullinga av naudnettet, avsluttar ho.