Saman med Sparebankstiftinga og Sparebanken Sogn og Fjordane skal NRK Sogn og Fjordane dele ut «Årets gründerpris 2013» under Temposeminaret i Florø.
Kjempesuksess i fjor
– Vi gjentek suksessen frå i fjor med gründerprisen. Vi hadde over 40 påmelde. Vi hadde vanvittig mykje oppmerksomheit rundt bedrifta Highstoft Solutions som vann i fjor, og fekk ein sjekk på 100.000 kroner og vart dratt fram på Temposeminaret i fjor. Dei var veldig fornøgde med heideren og anerkjenninga dei fekk, seier Pål Fidjestøl, kultursjef i Sparebankstiftinga .
- Les også:
- Les også:
No er kultursjefen på jakt etter gode kandidatar til prisen. Ein vinnar vil få 100.000 kroner som startkapital til nyskapinga si.
Må ha gjort pengar på bedrifta
– Vi leitar etter dei gründarane eller nytenkarane som allereie har bedriftsideen sin, og har fått inn litt pengar på ideen sin. Men bedrifta treng ikkje nøgdvendigvis gå i pluss. Vi ser etter folk som ikkje berre har site i sofaen og tenkt ut nokre gode idear, du må ha tatt eit tak og fått inn litt pengar alt, seier Pål Fidjestøl i Sparebankstiftinga.
Juryen består av Halvor Flatland frå Innovasjon Norge, Aud Melås i Flåmsbrygga AS og Arvid Andenæs i Sparebanken Sogn og Fjordane. Dei skal plukke ut fem-seks kandidatar til ein finale. Desse vil bli presenterte på NRK.no og i radiosendingane til NRK Sogn og Fjordane. Til slutt skal publikum stemme fram den beste ideen.
– I fjor var det så mange gode idear at det var vanskeleg å plukke ut den beste ideen, for det var tett i teten. Det var utruleg mykje høgare nivå enn vi hadde trudd, seier Fidjestøl.
Kriterium for juryvurderingane
Vinnaren blir kåra ved hjelp av publikum sine røyster i ei avstemming på NRK.no og ei fagleg vurdering frå juryen.
Kriterium for å delta i konkurransen:
- Prosjektet skal vere utvikla av personar frå Sogn og Fjordane og/eller heile eller delvis i fylket.
- Prosjektet skal ta utgangspunkt i ein konkret teneste- eller produktidé som er komme så langt i si utvikling at kommersialisering er komme i gang.
- Prosjektet må vere berekraftig utan negative følgjer for miljøet.
- Prosjektet si evne og vilje til å skape aktivitet, omsetnad og arbeidsplassar må ha potensial til å slå positivt ut.
Er du i gang med eit gründerprosjekt, sender du ein e-post til grunder@nrk.no. Skriv nokre linjer der du skisserer ideen og prosjektet, og du blir med i kampen om ein finaleplass og moglegheita til å vinne 100.000 kroner.
Fristen for å sende inn forslag til kandidatar er sett til 1.oktober. Årets gründerpris 2013 blir delt ut 1. november under Temposeminaret i Florø.