Toppkandidatar vil ha eitt Agder

– Eg blir betenkt over at sentrale politikarar i Arendal er så knallharde på nei-sida, for det er også klare pluss, seier ordførarkandidat i Arendal for Kristeleg folkeparti, Tormod Vågsnes.

• LES: Sterk nei-motstand

– Eg har trua på at vi kan stå sterkare saman. Personleg har eg opplevd fylkesgrensa meir som eit hinder enn som ein fordel, seier Arbeiderpartiets Tellef Inge Mørland, som er fylkesordførarkandidat i Aust-Agder.

Sterk motstand

Fleire meiningsmålingar den siste tida har vist framleis sterk motstand i Aust-Agder mot ei samanslåing av dei to fylka. Dei fleste toppolitikarane i Arendal har tona klart flagg mot eitt Agder føre folkeavstemninga om nokre veker.

Tormod Vågsnes tek no til motmæle mot det han meiner er einsidig framstilling frå sine politiske kollegare i kommunen. Han meiner saker som til dømes kampen for eit fullverdig sjukehus i Arendal for lett vert blanda.

• LES: Valvogna endeleg på vegen

– Det å få ned den offentlege administrasjonen bør det liggje gevinst i. Eg trur også næringslivet til tene på dette. Det bør liggje gevinst i vidare samarbeid i offentleg sektor. Eg tenkjer spesielt på dette med handtering av søppel. Der er nok mange område ein kan samarbeide betre enn vi gjer i dag, seier Vågsnes.

Byggje tillit

Tellef Inge Mørland vil ikke anbefale andre å stemme for fylkessamanslåing sjølv om han har teke standpunkt.

– Eg føler ikkje at eg kan anbefale folk å stemme ja. Det må dei finne ut av sjølve. Men eg skulle ynskje at ein kunne bruke meir tid på å byggje tillit, seier han.

– Det er mange som føler at dette vert ei samanslåing der Aust-Agder skal leggjast under Vest-Agder. Dei som er ja-folk burde ha brukt mykje meir tid på å vise at dette skal vere ei samanslåing mellom to likeverdige partar, meiner han.