Når Kvivsvegen opnar 22. september vil det korte ned reisetida mellom Nordfjord og Søre Sunnmøre monaleg. I går høyrde vi at mange nordfjordingar truleg vil velje å ta fly frå Ørsta-Volda, i staden for Sandane lufthamn Anda når vegen opnar.
- LES OGSÅ:
Næringslaga i Stryn og Hornindal har også vore med i eit forum som jobbar for å vidareutvikle flyplassen Ørsta-Volda, med støtte frå ordførarane i dei to Nordfjord-kommunane.
Magne Larsen som er leiar i Gloppen næringsorganisasjon har vanskeleg for å forstå dette og reagerer sterkt.
– Eg er veldig skuffa. Vi har jobba hardt for å halde liv i Anda, seier Larsen og vedgår at han føler at dette er illojalt av Stryn og Hornindal.
Dramatisk kortare reisetid
Det er no knappe tre veker til Kvivsvegen mellom Kalvatn i Volda og Grodås i Hornindal blir opna. Veg- og tunnelprosjektet vil føre til dramatisk kortare reisetid mellom indre Nordfjord og Søre Sunnmøre.
- LES OGSÅ:
- LES OGSÅ:
Den nye vegen vil også bety noko for kor folk i området vel å ta fly frå. Avinor sin ansvarlege ved flyplassen Ørsta-Volda, Kjetil Åren, sa at dei venta at mellom 15.000 og 20.000 nordfjordingar som før har nytta seg av Anda lufthamn etter vegopninga vil reise dit.
– Vi ser ei moglegheit
I samband med vegopninga har næringslaga i Stryn og Hornindal blitt med i eige forum som jobbar med forbetring av flytilbodet frå flyplassen Ørsta-Volda.
Ordførar i Hornindal, Anne-Britt Øen-Nygård stiller seg fullt og heilt bak dette.
– Vi ser no at det blir ei moglegheit til å kome seg til ein flyplass som er nærare, og då vil vi nytte oss av den, seier ho til NRK.no.
Svært overraska
Magne Larsen i Gloppen næringsorganisasjon er spesielt skuffa over at Stryn engasjerer seg for flyplassen lenger nord i staden for flytilbodet ved Anda.
– Skal vi styrke Nordfjord som region så må vi ta tak i dei fyrtårna vi har her. Når Stryn vel å gå andre vegen, så blei eg overraska, rett og slett, seier Larsen oppgitt.
Også den tidlegare KrF-kjempa og statssekretæren i samferdselsdepartementet, Svein Ottar Sandal frå Gloppen, meiner det ville vore meir naturleg at Stryn og Hornindal jobbar for Anda.
– Det er jo flyplassen for Nordfjord. Vi er ikkje fleire folk i Nordfjord enn at vi bør samle oss om dei tilboda vi har, seier Sandal.
Forstår ikkje kritikken
Sven Flo som er ordførar i Stryn har ingen forståing for kritikken frå Larsen og Sandal.
– Det å vere positiv til ei utvikling i ein større region, slik at vi er slagkraftige og i stand til å vekse. Det kan då umogleg vere negativt.
– Eg må seie eg er veldig overraska over reaksjonen, seier Flo.