– Breheimsenteret skal opp att

Det seier styreleiar Svein Norberg til Sogn Avis. Opplevingssenteret i Luster låg på kort tid i ruinar då flammane byrja å herje seint på kvelden 28. juli .

Når det no skal førast opp att, skal det vere i same arkitektur som det gamle.

• LES OGSÅ: Brannen framleis eit mysterium

– Det er naudsynt å byggje det opp att. Det var eit karakteristisk bygg og ein arkitektur som alle likte og som fungerte, seier dagleg leiar Peder Kjærvik til NRK.no.

Travlaste tida

Kjærvik seier ein aldri vurderte noko anna arkitektur då det vart klart at bygget skulle reisast opp att.

• LES OGSÅ: Breheimsenteret i Fylkesleksikonet

Brannen råka midt i den travlaste turistsesongen , noko som gjorde at senteret måtte få på plass mellombelse løysingar for å ta seg av allereie booka turar og oppgåver.

(Artikkelen held fram under TV-saka)

• LES OGSÅ: Sjekka senteret like før brannen

– Etter tilhøva har det gått fint. Vi hadde, og har, ein del forpliktelsar å ta oss av. Det er liksom ikkje berre å ringe å gje dei beskjed om å finne seg noko anna, seier han til NRK.no.

Brann starta inne

Lensmann i Luster, Asle Karoliussen, seier til Sogn Avis at politiet er sikre på at brannen starta inne på senteret. Dei utelukka at lynet slo ned i bygget, og at høgspentlina har medverka til brannen.

Dei vil no undersøkje om brannen kan skuldast overspenning på lågspenten.

– Vi kan seie nokolunde sikkert at brannen starta inne i bygget og kva del av hovudetasjen han starta, seier han til avisa.