Føret skaper kaos på Ørskogfjellet

Fleire stader i Møre og Romsdal har det vore stengte vegar måndag. Oversikta kan du sjå nederst i artikkelen.

På Vestnes-sida av Ørskogfjellet står fleire trailerar stille på grunn av føret. Sjåførar legg på kjettingar på bilane sine.

Vegtrafikksentralen åtvarer sjåførar av tunge køyrety mot å køyre over fjellet, og seier det er mykje vind og glatte vegar på strekninga.

På desse strekningane er det problem måndag morgon:

Røyr - Hellesylt: Vegen er stengt på grunn av to små ras, som Vegvesenet meiner kan føre til større ras seinare. Det blir sett inn ferje på strekninga.
Eidsdal - Geiranger: Stengt på grunn av ras. Ferje er sett inn som alternativ.
Ørskogfjellet: Fleire trailerar stod måndag morgon faste på fjellet, og problema er størst på Vestnes-sida. Politiet anbefaler tunge køyrety å vente med å køyre over.
Seivika - Tømmervåg: Ferjesambandet har redusert kapasitet, og ein tipsar melder om fleire gjenståande bilar på Tømmervåg-sida.
Ålesund - Nordøyane: Hurtigbåten vart innstilt måndag morgon, men går som normalt frå måndag ettermiddag.
Ålesund - Hareid: Hurtigbåten frå Ålesund til Hareid er tilbake i vanleg drift frå og med avgangen frå Hareid klokka 11.25. Båten måtte gi seg på grunn av vind måndag morgon, og Tide Sjø sette inn buss frå Sulesund til Ålesund for dei reisande.
Molde - Vikebukt: Tilbake i vanleg drift frå 12-tida måndag. Fleire avgangar på morgonen var innstilt.
Sølsnes - Åfarnes: Ferja har hatt problem med å ta med tunge køyrety frå Sølsnes, men det er no normal drift i ruta.