Superhelten Northstar held hender med kjærasren Kyle på framsida av det komande magasinet «Astonishing X-Men». Tegneserieforlaget Marvel annonserte førre veke at Northstar skal gifta seg i utgåva som kjem ut 20. juni.
Marvel går dermed i fotspora til konkurrenten DC Comics, som har avslørt at ein av deira superheltar skal koma ut av skapet. Dei mest kjende superheltane i DC Comics er Batman, Robin og Supermann.
– Eit av dei største ikona våre kjem til å avsløre at han er homofil i juni, sa forlegger Dan DiDio til ABC News.
Målet er å spegla mangfaldet blant lesarane. I september i fjor relanserte DC Comics alle teikneserebøkene, med mellom anna karakteren Voodoo som biseksuell, og Batwoman som lesbisk.
«Bra for dei vaksne»
– Dette er kult, me takkar og bukkar for all synelegheit. Men eigentleg skulle det berre mangla at nokre superheltar er homofile, det er jo så mange homofile som er superheltar i eigne liv, seier Bård Nylund, leiar i LLH, Landsforeningen for lesbiske, homofile, bifile og transpersoner.
– Kva betyr det å ha homofile superheltar?
– Det er med på å bygga ned førestillingar om homofile, og gjer det lettare for homofile å kjenna seg igjen i teikneseriane, seier Nylund.
LLH-leiaren trur homofile superheltar kan bryta ned fordommar hjå vaksne.
– I 2012 er det kanskje borna som har færrast fordommar, seier Nylund.
«Hjernevaskar born»
Den amerikanske grupperinga «One Million Moms» er ikkje like entusiastiske. I ei pressemelding hevdar dei at Marvel og DC Comics hjernevaskar born og unge ved å visa homofile superheltar.
«Born ønskjer å vera som superheltane sine. Dei imiterer superheltane og kler seg opp som dei. Kan du sjå for deg ein liten gut som seier «eg vil ha ein gutekjærast eller ektemann, akkurat som X-Men?, skriv «One Million Moms» på nettsidene sine.
One Million Moms ber no folk om å senda protestbrev til DC Comics og Marvel. Grupperinga er ein del av «American Family Association», ein kristenkonservativ organisasjon som hevdar å ha ein halv million medlemmer, og som har eit årleg budsjett på 15 millionar dollar. Organisasjonen blir klassifisert som ei hatgruppe av Southern Poverty Law Center.