I ein studie ved NTNU i Trondheim har forskarar funne at rotter gjekk ned 20–30 prosent i vekt etter at vagusnerven var lamma med Botox. Vagusnerven er ein nerve som er viktig i regulering av matinntak og appetitt.
– Det er ein moglegheit for at dette kan bli ein ny og trygg måte å behandle overvekt, seier PhD-student Helene Johannessen til NRK.no.
Johannesen er ein av forskarane som skal presentere prosjektet sitt på årets Forsker Grand Prix i Trondheim.
- Les også:
– Svært ønskeleg med ny behandling
Overvekt er eit stadig større problem, som også fører med seg risiko for mange andre sjukdommar. I 2012 var det ifølgje tal frå Helsedirektoratet 2081 personar som gjekk gjennom overvektsoperasjonar i Noreg.
Slike fedmeoperasjonar er irreversible, og ikkje utan risiko. Blant moglege komplikasjonar er infeksjonar, lekkasjar, magesår og ulike mangeltilstandar.
Johannesen er tilknytta Forskningsgruppe for eksperimentell kirurgi og farmakologi, som arbeider med å finne eit meir skånsamt alternativ til omfattande overvektsoperasjonar. Studien er også del av EU-prosjektet Full4Health.
–Det vil vere svært ønskeleg å finne ein ny, medikamentell behandling for overvekt, seier Avdelingssjef og overlege Nils Sletteskog ved Helse Førde til NRK.no. Sletteskog har vore med å utføre overvektsoperasjonar sidan oppstarten i 2001.
– Erfaringa viser at for det store fleirtalet av dei som har komme i kategorien sjukleg overvekt er det heilt uoppnåeleg å komme seg ut av det berre med eigeninnsats. Viss vi kan gjere det utan å øydeleggje magen på folk, ville det vere tenleg for alle som har behov for behandling, seier han.
- Les også:
- Les også:
Lurer nerven
Johannessen og hennar kollegaer har forsøkt fleire metodar for å manipulere vagusnerven, blant anna elektrisk stimulering og å fjerne reseptorar for nerven.
– Tanken er at viss vi kan lure denne nerven kan vi få nokre til å føle seg meir mett enn ein gjorde før, seier Johannessen.
Dei beste resultata har forskarane fått ved å blokkere nerven med nervegifta Botox. Rottene fekk sprøyta inn Botox direkte i magesekken. Når forskarane etterpå observerte dei i eit slags «Big Brother»-hus for rotter, fann dei at rottene åt mindre mat og gjekk ned 20–30 prosent i vekt i løpet av 5 veker.
Hos rottene varar effekten i 4–5 veker, men når dette blir gjort i pasientar forventar ein at det vil vare i 3–6 månader, ifølgje Johannessen.
- Les også:
Kliniske studiar
Metoden har blitt prøvd ut i menneske i utlandet, med blanda resultat.
–Men vi har brei erfaring frå dyreforsøka, og trur dette kan vere avgjerande for gode resultat, seier Johannesen.
Forskargruppa vil gå i gang med kliniske studiar på menneske så snart dei får etisk godkjenning.
–I første omgang er det aktuelt å invitere pasientar som er kandidatar til overvektsoperasjonar, men som av ein eller annan grunn ikkje kan få dette, seier Johannessen.