Landslagssjef Thomas Harstad set stor pris på at Ulrik Badertscher endeleg har fått ut potensialet sitt i konkurranse.
Foto: Terje Bendiksby / ScanpixFrå knapt å vere kjent i Norge har Ulrik Badertscher plutseleg blitt ein snakkis i heile snowboardverda.
Bare veker inn i sesongen merker nemleg 23-åringen at merksemda no kjem frå alle hald.
– Det er mange fleire som kjenner til meg. Fleire i bakken kjenner meg igjen og seier «grattis» når dei møter meg. Det er kult det, seier Badertscher.
- LES OGSÅ: – Kan ikkje forklare denne følelsen
– Meir sjølvtillit
Tidleg i desember trona han øvst på pallen då Norge sikra dei tre første plassane i prestisjetunge Air & Style i Beijing.
Triumfen er grunnen til at han no er på konkurrentanes lepper før VM på heimebane i februar.
– Ein slik sesongstart gjør at eg får mykje betre sjølvtillit seinare, seier Badertscher.
- SJÅ VIDEO:
Ulriks vinnarhopp i Beijing
Mista flyet før US Open
Men vegen til verdstoppen har vore kronglete for den unge nordmannen. For sjølv om troféa tar meir og meir plass på hylla, avslører guterommet i amerikanske Breckenridge kva stempel han har hatt gjennom dei fire åra på landslaget:
Nemleg som lagets distré rotekopp som kan gløyme dei mest openbare ting.
Til og med det å møte opp til konkurransar i utlandet.
– Ein kan jo spørje han om kvifor han kom for seint til US Open, og kvifor han mista flyet sitt, seier lagkamerat Fredrik Austbø med eit lurt smil.
Og her er grunnen, ifølgje Badertscher sjølv:
– Eg sat på do og spelte på mobilen, flirer 23-åringen.
- SJÅ OGSÅ:
Badertscher mot verdenstoppen
– Han har endeleg fått struktur på ting
No har Badertscher stramma seg opp, og sørga for at tida som supervims er eit tilbakelagt kapittel.
Dette viser igjen både i konkurransar og innad i laget.
– Ulrik har vokst veldig dei siste to åra. Det ser ein på utviklinga hans i det siste. Vi snakkar om eitt av dei største norske talenta på snowboard som endeleg har fått litt struktur på ting, seier landslagssjef Thomas Harstad.
Skal ta større sjansar
Og med hovudet på rett plass har Badertscher funne riktig innstilling. Ein innstilling som skal gje gode resultat gjennom heile VM-sesongen.
– I konkurransar blir det første- eller sisteplass. Eg skal ikkje sikre inn ein middels plassering. Eg har ikkje tenkt slik før. Men no er det bare første- eller sisteplass som gjeld, seier Badertscher.
