I store delar av Sogn og Fjordane får ein ikkje ringt om hjelp dersom ein er i krise eller naud. Telenettet og helseradionettet er nede i fleire kommunar.
Beredskapssjef i Helse Førde, Bjørn Morten Øen, seier dei heller ikkje har kontakt med ambulansar og kommunelegar fleire stader.
– Vi er i ein svært utfordrande situasjon. Vi har vanskar med å få tak i personellet vårt enkelte stader, og pasientar har problem med å få tak i helsevesenet, seier Øen til NRK.no.
- LES OGSÅ:
- LES OGSÅ:
Utfordringar også for politiet
Dei største utfordringane er i Nordfjord der telenettet er nede i storparten av kommunane.
Også politiet opplever situasjonen som krevjande. Sambandet deira er nede fleire stader, men dei jobbar no med å få på plass alternative løysingar.
– Vi har satelittelefonar som kan brukast. Til no har vi ikkje høyrt om situasjonar som har gått ut over liv og helse, seier operasjonsleiar Odd-Arve Solvåg ved Sogn og Fjordane politidistrikt.
Helse Førde: – Må oppsøkje sjukehus sjølve
Helse Førde oppmodar folk som ikkje kjem gjennom på telenettet, og som treng helsehjelp, om å oppsøke nærmaste sjukehus.
Ved alle sjukehusa er det straum, eller naudstraum, og alle viktige funksjonar er intakt.
– Treng ein helsehjelp må ein rett og slett køyre til nærmaste sjukehus sjølve, seier Øen.
(Artikkelen held fram under biletet)
Vaktleiar Dagny Røyrvik ved Alarmsentralen Sogn og Fjordane seier stormen har skapt store utfordringar for brannvesenet.
– Det har vore svært travelt, og samstundes har vi hatt store problem med kommunikasjonen. Situasjonen er rett og slett trasig, seier Røyrvik.
Får ikkje kontakt med AMK-sentralen
Vakthavande kommunelege i Bremanger, Kan Shanker, er utan telefon og får ikkje tak i AMK-sentralen til Helse Førde.
I ein e-post til NRK skriv Shanker at han har hengt opp eit informasjonsskriv på legekontoret i Svelgen slik at folk får vite kvar dei kan få tak i vaktlege i Bremanger.
«Alle som treng kontakt med legevakt i Bremanger kommune kan køyre direkte til Svelgen legekontor dersom dei ikkje får tak i AMK per telefon.»
I e-posten ber Shanker også NRK om å gje denne beskjeden vidare til AMK-sentralen til Helse Førde.