– Opprinneleg har vi framleis trua på Tørum, men når du har spelarar og leiing som ikkje vil satse på han, må det skje noko allereie no. Det som må skje er at dei får inn nytt blod på trenarsida, seier pressetalsmann i Menigheden, Terje Roland til NRK.no.
– Etterlyser de eit trenarskifte?
– Vi gjer forsåvidt det. Når ting har blitt som dei har blitt, gjer vi i Menigheden det, seier han.
– Tafatt forsøk
Etter at Start gjekk til pause med 1-0 leiing mot Stabæk i går, vart det total kollaps i andreomgang. Laget tapte 2-4 og spelte sin femte kamp på rad utan siger i eliteserien. Start-trenar Knut Tørum var langt nede etter tapet i går.
– Eg har definitivt ikkje sett Start så dårlege tidlegare. Eg har nesten aldri i fotballivet mitt vore med på eit så tafatt forsøk på å ta poeng, sa Tørum.
Rett før sesongstart vart det klart at Tørum ikkje får ny kontrakt med sørlandsklubben. Klubbleiinga har fått kraftig kritikk for den avgjerda.
– Det er ein kjip situasjon vi har komme i. Det var kjipt før sesongen starta med at Tørum-saka vart som den vart. At vi skal ha ein trenar som sit på oppsigelse ut sesongen blir hardt. Det blir vanskeleg å motivere spelargruppa vil eg tru, seier Roland.
TRUFASTE: Menigheden vil ha ny trenar i klubben.
Foto: Schrøder, Tor Erik / SCANPIXKrav handling
Pressetalsmannen krev no handling frå klubben si side.
– No må det skje noko. Vi kan ikkje halde fram den tapsrekkja vi er inne i no, seier han.
– Det vert dårlegare og dårlegare på bana, dei presterer ikkje, har ikkje motivasjon og gir ikkje hundre prosent. Vi håpar noko skjer så raskt som råd, iallefall i sommarpausen, seier han.
NRK.no har prøvd å kontakte leiinga i Start, men ingen svarar.
