Cindy tok til seg revekvalp

Den tre månadar gamle sølvreven Lucky Me svinsar utolmodig rundt føtene til Linda Steen, og rykker i det kvite bandet. Adoptivmor Cindy følgjer nøye med, og slikkar han forsiktig på hovudet. Huskyen har grunn til å vere på vakt, for det såg lenge mørkt ut for den vesle krabaten.

Oppdrettsrev

Linda Steen leiger leiligheit hos ein reveoppdrettar på Byåsen i Trondheim. Då ho fekk vite at ei revemor hadde byrja å drepe ungane sine, tok ho til seg dei to kvalpane som enno var i live.

– Dei var tre veker gamle. Den eine døydde, og vi var veldig i tvil om han her kom til å klare seg. Han var nesten ihelbitt, og hadde store sår i buken. Oppdrettaren rekna han som død, seier Steen.

I dag spring han energisk rundt saman med leikekameraten Chiquita. Mopsen lograr kraftig i møtet med den eksotiske kompisen, som no er blitt tre månadar gammal. Lucky Me er i live takka vere god timing og kjærleg omsorg.

– Han skal aldri bli pels! slår Steen fast.

• Les fleire historier om dyr

Husky vart adoptivmamma

Medan revekvalpen kjempa for livet i pelsoppdrettet, gjekk huskyen Cindy rundt med eit tilsynelatande ønske om å bli mor. Ho har nemleg innbilt svangerskap kvar gong ho har løpetid.

– Det har skjedd at ho har kome inn med kattungar i kjeften, og trudd at det er hennar ungar, fortel Steen.

Akkurat når Lucky Me trengte ei ny mor, var naboen Cindy dermed klar med melk i jura. Steen la kvalpen inntil huskytispa, og han starta å drikke.

– Ho tok han raskt til seg, og passa på han. Då eg skjønte at han kom til å klare seg vart eg kjempeglad, seier Steen.

– Som ein hund

I dag går ho tur med reven saman med dei to hundane, og er ikkje i tvil om at Lucky Me er teken inn i varmen for godt.

– Eg har allereie blitt glad i han. Han er tam, og skal dresserast akkurat som ein hund, seier Steen, men innrømmer at «sølvhunden» får ekstra merksemd når dei går tur.

– Det er mange som stoppar og spør om dei kan helse på han. Det er artig å ha ein rev, seier dyreelskaren.

Ho seier det er uaktuelt å sleppe reven fri, fordi han allereie er så tam.

– Det einaste problemet er at han uler frå revegarden om natta, ler ho.

Vil redde fleire

Steen klappar det sølvgrå hovudet omsorgsfullt, men Lucky Me har ikkje tid til å sitte stille. Han luktar nysgjerrig på alle busker og steinar han ser, tuslar bort til Chiquita for litt leikeslåsting, og surrar bandet rundt føtene til matmora på vegen.

– Han er i fin form no, og er både kosete og stuerein, seier Steen.

Ho vil gjerne redde fleire kvalpar i framtida, og er ikkje redd for at omsorgen kan bli for omfattande.

– Det kan godt hende vi tek til oss fleire kvalpar neste sommar, for det er då Cindy får innbilt svangerskap, fortel Steen.