Det syner regjeringa sine eigne fattigdomstal. Medan ti prosent av innbyggjarane i Oslo er fattige, er det tilsvarande talet under tre prosent i Sogn og Fjordane.
I den tradisjonelle industrikommunen Høyanger har arbeidarane kvitta seg med fattigdommen, etter år med nedganstider og tap av hundrevis av arbeidplassar.
Industrilykke i Høyanger
Lilly Slinde frå Høyanger er blant dei som har det godt.
Faren hennar, Bjarne Fossen, tente så godt at han kunne kjøpe si eiga hytte på 60-talet; det var luksus for ein industriarbeidar for 50 år sidan.
Familien nyt framleis godt av hytta som faren bygde. Dei er der både sommar og vinter.
I dag er Høyanger blant dei kommunane i landet med færrast fattige. Slinde veit godt kva faren ville tenkt om at det er så få fattige i kommunen:
– Han ville meint at det hadde vore svære greier. Det er eg heilt sikker på, seier ho.
- LES OGSÅ:
– Vi har det veldig bra
Regjeringa har valt å telje tal fattige basert på ein definisjon frå Statistisk sentralbyrå (SSB).
Slik er definisjonen: «Fattige er definert som personar med inntekt som er lågare enn halvparten av medianinntekta i de ulike regionane.»
Totalt er det over 200.000 personar som er fattige i Norge. Dei fattigaste innbyggjarane bur i folkerike fylke på Austlandet.
Slinde merkar at det er færre fattige i Høyanger kommune no enn før:
– Eg trur ikkje det er så mange fattige no. Det er jo nokre minstepensjonistar her, men eg trur vi stort sett har det veldig bra, seier ho.
Ho får støtte frå LO-leiar i Ytre Sogn, Astrid Refsdahl Henden.
– Høyanger har vore ein rik kommune i mange år. Vi har industri og har kraftinntekter i mange år framover. Fagrørsla har gjort ein kjempejobb og fått på plass god løn og bra vilkår, seier LO-leiaren til NRK.