Det er den store handlehelga som står for tur. På kjøpesentera blir det meir og meir hektisk etterkvart som vi nærmar seg julaftan. Og alle har vel kjent på at akkurat det kan vere litt stressande?
– Eg har ikkje begynt eingong. Eg kvir meg på å starte, og eg veit ikkje eingong kva folk i familien ønskjer seg. Det blir hardt å komme igang, seier Bjørn Arve Kjelsnes.
I siste liten
Han er ein av dei som er seint ute til årets julehandel. Og i følgje tal frå Statistisk Sentralbyrå som viser nye omsetningsrekordar for desember, blir han ikkje åleine om å bruke mykje pengar den siste tida fram mot jul. Kvar nordmann brukar i snitt over 9 700 kroner før jul.
– Eg jobbar kvar dag og har ikkje tid til å handle. Det blir «i siste liten-handel» for meg.
Treng kaffipause
Andre er ute i litt betre tid, men det er ein stor jobb som krev både innsats og pausar, i følgje Asbjørn Flaten.
– Vi kom nesten i mål, og har berre finpussen igjen. Den skal vi ta når vi har fått oss ein kopp kaffi.
– Har du kjøpte mange julegåver?
– Vi har kjøpt 25, det er mellom anna til born og borneborn.
Lokkar kundane
Og handelsstanden gjer sitt for å lokke folk til å kjøpe. Siv Vatne på skobutikken DNA i Førde har fått god respons på tilboda sine.
– Vi har halv pris på finsko, så det hjelper godt på.
Svanhild Tennebø på butikken Kremmarhuset merkar òg at desemberhandelen er godt i gang.
– Det går jamnt av alt, og det har begynt å bli tomt av enkelte ting.
– Gi meir til veldedige føremål
Men kva skal ein synest om den store veksten i julehandelen, i følgje mennene på gata i Førde?
– Det har nok gått ut meir pengar i år enn i fjor. Gjevargleda er stor og det er hyggeleg å glede andre, seier ein vi har snakka med.
– Eg tykkjer vi burde gi meir til veldedige føremål. Dei fleste av oss har nok av ting. svarar ein annan.
Brukte og rettferdige julegåver
Men finns det alternativ til kaffimaskinar og DVD-ar på kjøpesentra? På ein ganske roleg butikk ligg det ein butikk utan kjøpepress.
– Vi kan kanskje kalle det etiske julegåver eller miljøvennlege gåver. Når vi ser på forbuket vårt, så burde vi ha fleire jordkloder. Difor må vi tenkje alternativt, seier butikkeigar Hanne Schnitler i butikken Om Att.
I den vesle butikken sin sel ho mellom anna brukte ting og rettferdig varer. Nokre av tinga er laga av til dømes gamle brusboksar.
– Det går an å gi brukte klede og ting. Vi har ei til dømes ei Gucci-veske og eit fint sjal av ull og silke som passar til ei kvinne.
– Kva tenkjer du om at vi sler kjøperekorden kvart einaste år før jul?
– Eg tykkjer det er skremmande. Vi lagar eit stort avfallsproblem når vi held på slikt som dette.