– Eit stort universitet som omfattar høgskulen trur eg er ein veldig god ting, seier næringslivsmannen og velgjeraren Trond Mohn.
Han meiner at Universitetet i Bergen og Høgskulen i Bergen må slåast saman.
– Då får vi mange fagfelt saman og blir meir synlege i samfunnet. Det er alltid eit godt spørsmål å stille. Kva plass skal institusjonen ha i samfunnet? Eg trur det er viktig at vi høgskulen kan brunga universitetet nærare samfunnet, seier Mohn.
I går gav Mohn 25 nye millionar til ingeniørutdanninga ved høgskulen. Gåva skal styrka forskinga ved avdelinga for ingeniørfag. Gjennom Framo-stiftelsen har Mohn dermed bidrege med 62 millionar til ingeniørutdanninga.
- LES OG:
Vil vekse saman
Ole Gunnar Søgnen som er rektor ved Høgskulen i Bergen, ønskjer å samarbeide med universitetet.
– Vi er opptatt av å utvikle samarbeidet mot universitet sånn at vi på sikt kan vekse saman som ein institusjon, seier Søgnen.
– På det tekniske området så er universitetet og høgskulen veldig komplementære. Det vil vere lett å ta ut gevinstar frå eit sånt samarbeid. No ventar vi på ei stortingsmelding som vi håpar vil gje nokre svar, legg rektoren til.
Ny høgskulekart
Regjeringa skal om to veker leggja fram ei stortingsmelding om korleis høgskulekartet i landet skal sjå ut.
Kunnskapsminister Torbjørn Røe Isaksen (H) har lova at han ikkje vil leggje ned studiestadar, men har bedt alle høgskular om å sjå seg om etter ein partnar.
– Det er så mange analysar som har peika på at om du har små, fragmenterte fagmiljø blir ikkje kvaliteten på forsking eller utdanning nødvendigvis bra nok, seier han.