Det er familien som opplyser til Stavanger Aftenblad at Jakob Aano har gått bort.
Jakob Aano blei fødd og vaks opp i Sauda i Rogaland. Han blei 95 år gamal.
Jakob Aano sat på Stortinget som representant frå Rogaland i 20 år, frå 1965 til 1985. I dei to siste åra på Stortinget var han leiar i Utanrikskomiteen. Han var også nestleiar i Kristeleg Folkeparti i denne toårsperioden.
Kjempa for dei som hadde minst
– Han var ein svært klok, varm og raus mann. Han fekk folk til å føla seg verdifulle, så det var ein mann det var lett å bli glad i, seier dagens nestleiar i partiet, Olaug Bollestad.
Ho trekk også fram at Aano var ein mann som alltid tala saka til dei som hadde minst. Og ein mann som stod ved sine verdiar.
– Han våga å stå på barrikadane, ikkje berre i retorikken, men også i gjerning og ord, seier Bollestad.
Løfta utanrikspolitikken
Ho meiner også at han har sett spor etter seg i partiet.
– Han var med på å løfta utanrikspolitikken og bistandspolitikken til KrF, seier Bollestad.
Før Aano blei vald inn på Stortinget hadde han jobba fleire år som misjonær i Tanzania. Bollestad trur det var med på å forma han som politikar.
– Å vera i Afrika i så mange år som det Jakob var, det vil alltid setja spor i eit menneske. Han var veldig oppteken av at me skulle prioritera å fordela godene, visa tydeleg at me brydde oss om folk. Ikkje berre i ord, men også i handling, seier ho.