– Eg har definitivt ikkje sett Start så dårlege tidlegare, seier Tørum til NRK.no.
– Eg håpar dette er ein vekkjar for enkelte. Her må det knallhard jobbing til for å komme tilbake igjen og vere der vi trur vi skal vere og der vi håpar å vere, seier Start-trenaren.
Tafatt Start-lag
Heimelaget kom godt i gang heime i Kristiansand. Tidlegare Stabæk-spelar Espen Hoff sende gultrøyene i leiinga etter 32 minutt. 1-0 var også pauseresultatet.
Men i andre omgang var det totalt stopp for heimelaget. Stabæk utlikna eitt minutt ut i andre omgang ved Pálmi Rafn Pálmason. Tre minutt seinare tok bortelaget leiinga. Trass i at dei utlikna, klarte ikkje Start å svare då Stabæk gjekk opp til 3-2 like etter.
– Eg har nesten aldri i fotballivet mitt vore med på eit så tafatt forsøk på å ta poeng, seier ein ærleg Tørum, som har opplevd å tape 1-8 mot både Molde og Vålerenga i si Start-karriere.
– I dag er vi eige gras og kampen skal vere vår. Måten andreomgangen vert gjennomført på, måten dei får score måla sine på, og ikkje minst fråveret av vilje til å komme tilbake å vinne, har eg aldri vore med på, seier han.
– Det er utruleg smerteleg å stå her å prate om det etterpå, seier Tørum.
Nærmar seg botnen
Med tap for Stabæk står Start utan siger på fem kampar. Laget ligg berre to poeng over nedrykksstreken.
– Det seier seg sjølv at når du ikkje tek poeng vil du ramle på tabellen. Det viktigaste er at dersom vi held fram slik, kjem vi ikkje til å ha eitt poeng meir når eliteserien er ferdig, seier han.
– Det er første gang eg har hatt det slik som Start-trenar. Det var ikkje noko i denne kampen vi kan stå for. Det er utruleg vondt, seier Tørum.
Også Espen Hoff var langt nede etter eit nytt nederlag.
– Det verkar som om vi er strålande nøgde med førsteomgangen, og trur at dette skal gå av seg sjølv, seier han til NRK.no.
– Fantastisk lagmoral
– Vi er ikkje på nett i det heile, og Stabæk trillar over oss i periodar. Slik er det når vi ikkje leverer på det nivået vi må for å vinne fotballkampar, seier Hoff etter tapet mot gamleklubben.
Stabæk tok med det sin sjette siger for sesongen og reiste seg etter tapet for Hønefoss i cupen. Laget ligg no på tredjeplass på tabellen med 18 poeng på ni kampar.
– Vi har ein herleg lagmoral i gjengen. Vi trivast godt ilag, og har tru på at vi kan spele bra fotball. Vi vert ikkje særleg påverka når vi får mål imot. Det gjeld å køyre på til «the bitter end». Etter kampen kan ein summere om ein lukkast eller ikkje, seier Stabæk-trenar Jørgen Lennartsson.
– Start er eit godt lag
Islendingen Veigar Pall Gunnarsson var naturleg nok ein glad mann på Sør Arena.
– Vi er nesten to ulike lag i første og andre omgang. Det same skjedde mot Odd Grenland i førre serierunde. Vi må jobbe med dette. Klarar vi å spele heile kampen slik vi gjer i andre omgang, trur eg ikkje det er mange som kan slå oss, seier han.
Stabæk-angriparen trur Start vil komme sterkt tilbake.
– Det var ein vanskeleg kamp. Når vi gjekk opp i leiinga fekk vi ein utruleg sjølvtillit og ekstra sprut i beina. Vi var ekstremt gode i dag. Men Start er eit bra lag, og eg trur ikkje det er mange lag som kjem hit og tek med seg tre poeng, seier Gunnarsson.