– Gammaldags syn på ei grasbane

– For meg verkar det som mangel på kunnskap om korleis vi har moglegheit til å drive denne grasmatta, seier Torleiv Ugland som er ansvarleg for grasmanna på Sør Arena i dag.

• LES: Redder Start frå konkurs

For eit snautt år sidan vart grasmatta kåra til Noregs beste. Tidlegare denne veka vart det føreslått at det skal leggjast kunstgras som ein del av redningspakka for klubben, som er i store økonomiske problem.

Vil sleppe til breiddeidretten

Kristiansand kommune vil låne Start fem millionar kroner til å leggje kunstgras. Samstundes vil kommunen årleg betale Start 250 000 kroner til Start for å drive breiddeanlegget.

– For å få ein meir berekraftig økonomi for Start ynskjer dei å leggje om til kunstgras. Tanken med Sør Arena var i sin tid at det også skulle vere eit breiddeanlegg, men Start ynskte då naturgras. Så dette er eigentleg berre ei oppfølging av det som var intensjonen då ein bygde Sør Arena, sa økonomidirektør i kommunen, Terje Fjellvang.

• LES: Hoff: – Trist på miste gressmatta

Men Torleiv Ugland som dagleg jobbar med å sikre ei best mogleg grasmatte på Sør Arena, kjøper ikkje det argumentet.

– Naturgraset toler mykje

– Vår tilbakemelding har vore klar. Vi har oppfordra dei til å ta inn så mange treningar som mogleg. Dei kan køyre på alt dei vil, seier Ugland til NRK.no.

– Så du meiner at dagens naturgras på Sør Arena vil tole langt meir bruk enn i dag?

– Vi har informert både Start og Kristiansand kommune om at vi meiner at bana toler at du køyrer inn full breiddeidrett, seier han.

• LES: Nye tider i Start etter nedrykket

Ugland vedgår at driftskostnadene er langt rimelegare med ei kunstgrasbane. Men han påpeikar at kunstgraset må bytast langt oftare enn ei naturgrasbane. Dermed vil kostnadene i det lange løp bli omtrent dei same.

– Gammaldags

– Eg trur det handlar litt om ei gammaldags forståing av at naturgraset er noko ein ikkje kan bruke på denne måten som vi faktisk har bevist at vi kan gjere på Sør Arena, seier Ugland.

Dekkeskiftet på Sør Arena har skapt reaksjonar i fotball-Noreg. NISO-leiar Joachim Walltin rasar mot fotballforbundet si satsing på kunstgras. Han peikar blant anna ei undersøking som viser at tre av fire toppspelarar ikkje vil spele på kunstgras.

• LES: – Skremmande at de ikkje hører på spillerne

Mange spelarar meiner at kunstgraset er for hardt å spele på og at sjølve spelet blir annleis.

NISO er kritisk

– Det bør vere sjølvsagt at dei som styrer høyrer på utøvarane, men det gjer dei ikkje. Det er skremmande at dei har ei haldning om at dei ikkje treng det, sa Walltin med klar adresse til fotballforbundet og kommunane.

Toppfotballsjef Nils Johan Semb kom med følgjande forklaring på kvifor NFF er positive til kunstgras.

– Det har klimatiske fordelar. Det gir lengre brukstid og opnar for at fleire enn a-laget kan bruke arenaen. Men eg trur også at det bør vere ei grasmatte tilgjengeleg for trening, sa Semb.