Brukar lang tid på dommaravhøyr

Ifølgje lova skal det ikkje gå meir en 14 dagar frå anmeldelse til det vert gjennomført dommaravhøyr.

Ifølgje årsrapporten frå Barnehuset tok det i gjennomsnitt 82 dagar før dommaravhøyr vart gjennomført i valdssaker.

I valdtektssaker tok det i snitt 42 dagar.

Bryt 14 dagars fristen

– Enkelte saker tek på grunn av kompleksiteten lang tid. Det skal ikkje mange slike saker til før det statistisk sett ser ut som om sakshandsamingstida er uforsvarleg lang, skriv Barnehuset i sin rapport.

• LES: Bruken av Barnehuset øker

Barnehuset skriv at det gir eit meir korrekt bilete å fokusere på medianen av sakshandsamingstida.

Då kjem ein ned i 44 dagar i valdssaker, medan det i seksuelle overgrepssaker var 36 dagar.

Likevel vert altså fristen på 14 dagar broten.

Lang tid før oppmoding

Barnehuset skriv også at det tok i gjennomsnitt 60 dagar frå anmeldelse til det vart sendt oppmoding om dommaravhøyr til tingretten.

I valdssaker var gjennomsnittstida 60 dagar, medan det tok 22 dagar i gjennomsnitt for seksuelle overgrep.

– Dette viser at også ventetid i domstol har utslag for sakshandsamingstida. Det er sikkert fleire faktorar som kan forklare dette, og som det er viktig å setje fokus på for å redusere ventetida for barn og vaksne psykisk utviklingshemma, skriv Barnehuset i rapporten.

I oktober i fjor fortalde NRK at Barnehuset i Kristiansand toppa ventestatistikken på landsbasis.

Då sa barneombod Anne Lindboe at dårleg prioritering er mykje av årsaka til den lange ventetida.

– Treng auka fokus

– Det er rett og slett snakk om å prioritere barn. Problemet er at det finst ein del tilgjengelege ressursar, men vi brukar det ikkje på barnesaker, sa Lindboe.

– Vi treng auka fokus hos politiet, barnevernet og helsevesenet på barn, som vert utsett for vald og kor alvorleg dette er, sa ho.