Det har tatt eitt år og har kosta 23 millionar kroner å utbetra Fylkesveg 711 til Svandalen.
Ein kilometer av den smale vegen opp til skitrekket i Sauda er nå blitt breiare med to køyrefelt.
Glad ordførar
Fredag klokka 11 blei vegen opna med både fylkesordførar Tom Tvedt (Ap) og Sauda-ordførar Laura Seltveit (Ap) til stades.
- Me har nå fått ein fantastisk flott veg opp til Svandalen. I dag er eg glad for at me har fått dette til, seier Seltveit.
Glad fylkesordførar
Også fylkesordføraren er glad for at den smale vegen nå har blitt breiare.
- Vegen har vore smal og i dårleg stand. Nå opnar me ein veg som er tilrettelagd for den auka trafikken til skitrekket og naturen rundt, seier han.
Vegen er fullfinansiert gjennom fylkeskommunale midlar. I tillegg har Sauda kommune bidratt med ein million kroner.
Glad leiar av skitrekket
Leiinga ved Sauda skisenter har lenge irritert seg over den dårlege vegen. Folk har køyrd seg fast på veg oppover til skitrekket på grunn av den dårlege vegstandarden.
- Nå ser alt betre ut. Den nye Svandalsvegen er bra for både lokalsamfunnet og alle skituristane i Sauda, seier dagleg leiar i Sauda skisenter, Lars Reidar Fosstveit.
