Marianne Sandvik
Det er berre eit halvt år sidan 16 år gamle Marianne Sandvik frå Hundvåg i Stavanger blei medlem i Stavanger AUF.
– Ho treivst svært godt og hadde allereie vore med på ein tur til Preikestolhytta med ungdomsorganisasjonen, seier Gaute Sandvik, far til Marianne.
Han sette seg på flyet til Oslo lørdag morgon etter å ha fått beskjeden om at dottera hans var ei av dei sakna etter den dramatiske skytinga på AUF-sommarleiren på Utøya. Han er svært prega av situasjonen.
Marianne skulle byrja på Helse og sosialfag på Jåttå vidaregåande skule til hausten.
Sondre Dale
Sondre Dale frå Haugesund er 17 år. Ein rørd leiar for Haugesund Ap, Laila Thorsen, kan fortelja at Sondre var ein roleg og engasjert gut.
Han gjekk på ei yrkesfaglinje på Karmsund vidaregåande skule, og på fritida skal han ha likt å spela gitar.
Thoresen har vore i kontakt med dei nærmaste pårørande til Sondre, som reiste til Utøya då dei fekk beskjeden om at han var sakna.
Jamil Rafal Yasin
20 år gamle Jamil Rafal Yasin frå Egersund er også ei av dei sakna rogalendingane.
Jamil var på Utøya saman med sin bror, som kom frå skytinga med lettare skadar i ein arm.
Opphavleg kjem Jamil frå Irak og bur nå med familien sin i Egersund.