I innleiingsforedraget sitt i Gulating lagmannsrett i dag la førstestatsadvokaten vekt på at dommen i Høgsterett må få konsekvensar for dei to som no møter til ein ny ankerunde i lagmannsretten.
Den øvste rettsinstansen her i landet skjerpa i fjor straffa mot dagleg leiar i Vest Tank, Jostein Berland, frå eitt og eit halvt til to år. I tillegg vart frikjenninga av Vest Tank- rådgjevaren Karl-Jan Erstad frå lagmannsretten oppheva, slik at Erstad no må stilla i lagmannsretten på nytt.
– Me meiner Høgsterett med dette har tatt stilling til spørsmålet om medverknad, seier Istad om rådgjevaren, som vart frikjend i førre runde i lagmannsretten.
Les og:
Strengare straff
Spørsmålet om rådgjevaren kan stillast til ansvar for å ha medverka til eksplosjonen vert sentralt i lagmannsretten.
Istad meiner at skjerpinga av dommen mot dagleg leiar Jostein Berland må føra til strengare straff òg for styreleiar Trond Emblem.
– Det er klart at straffa Jostein Berland fekk må få ein del å seia for kva straff ein landar på her. I tillegg gjev høgsterettsdommen nokre føringar på om rådgjevaren skal straffast for medverknad, seier han.
- SAMLESIDE: Alt om Sløvåg-eksplosjonen
– Økokrim har misforstått!
Advokat Torbjørn Sognefest Kolås, som forsvarar rådgjevaren, meiner høgsterettsdommen ikkje bør spela inn i særleg grad.
– Då har aktor kort og godt misforstått fullstendig. Me skal ha ei heilt ny prøving av bevisa her. Om me skal legga til grunn det som har vore før hadde me jo ikkje trengt å vera her, seier Sognefest Kolås.
– Me har ikkje vorte dømt ein einaste dag fengsel utan vilkår enno, og skal klara å gå klar igjen, seier forsvararen.
– Har lite å seia for Emblem
Også forsvararen til den andre av dei to hovudtiltalte etter eksplosjonen i 2007, styreleiar Trond Emblem, går for full frifinning i lagmannsretten.
– Det gjer me definitivt. Me meiner økokrim trekkjer styreleiaransvaret alt for langt i denne saka, seier Per Magne Kristiansen.
Han meiner dommen mot dagleg leiar i selskapet Jostein Berland vil ha lite å seia for saka i lagmannsretten.
– Det var Berland som var dagleg leiar, det er det ingen tvil om. Spørsmålet her vert kva som var linken mellom Berland og Emblem.
– Men trur du verkeleg på full frifinning?
– Me har vorte frifunne på fleire punkt tidlegare, så eg utelukkar ikkje at det skjer igjen, seier forsvararen til NRK.no.
Seks veker i retten ventar
I tingretten fekk Berland og Emblem den same dommen på eitt og eit halvt år fengsel utan vilkår.
I tillegg vart dei frådømt retten til å driva eiga verksemd i fem år og å vera styreleiar eller dagleg leiar i eit selskap som treng løyve frå Klima og forureiningsdirektoratet eller Direktoratet for samfunnsikkerhet og beredskap.
Det er sett av seks veker til rettssaka i Gulating lagmannsrett, 70 vitne skal i vitneboksen.
Les og: Framleis null aktivitet i Sløvåg