Politikk - ikkje berre amatørskap

Av politisk medarbeidar Bjørn Bø

Dette er politikk - og det er utslag av den posisjonen NRKs distriktsorganisasjon har fått som eit slags motkulturelt symbol.

Og det er politiske ryggmargsrefleksar som kjem til syne både hjå Valgerd Svarstad Haugland og andre politikarar når dei ser teikn til endringar i sitt allmennkringkastingsbyggverk.

I ei heilt ny medieverd har politiske styremakter gjort NRK til eit aksjeselskap. Meininga var frigjering frå politisk detaljstyring. Men ikkje alle politikarar ville det heilt.

Difor måtte det koma ein konfrontasjon, sjølv om kulturministeren kallar det dialog. I denne situasjonen får kulturministeren sjølvsagt kritikk for å tråve ureint. Ho gjer livet vanskeleg både for NRK-styret og for krinkastingssjefen. Ho syner at NRKs friare liv under aksjelova har avgrensingar. Og framferda kan verke plump i det Høgre-partiet ho regjerer saman med.

Men som partileiar får ho eit høve til å rette litt opp på eit distriktspolitisk ry som er heller tvilsamt for tida.

Og om saka skulle havne i Stortinget, vil ikkje eg spå no om kva som skjer. Der er det mange kryssande interesser, og der blir i alle fall det økonomiske grunnlaget for NRK - lisensen - fastsett.

Allmennkringkastinga er eit politisk produkt, same kor mykje kringkastingssjefen føreles om aksjelova.