Elbil

Ap vil at dei som kjøper dyrare elbilar skal betale moms av summen som overstig 600.000 kroner. Partiet vil også gjere nye bensin- og dieselbilar dyrare, for å nå målet om å berre selje utsleppsfrie bilar innan 2025. I tillegg vil partiet bygge ut ladestasjonar over heile landet.

Høgre vil gradvis trappe ned fordelane for elbilar, i første omgong på dei dyraste elbilane. Målet er at alle nye bilar skal vere utsleppsfrie i 2025. Det skal alltid løne seg å kjøpe låg- og nullutsleppsbilar.

Frp vil at bensin- og dieselbilar skal ha same avgiftsnivå som elbilane. Derfor vil partiet redusere ei rekke avgifter, som eingongsavgifta og omregistreringsavgifta. Frp vil også stanse forbod mot bensin- og dieselbilar.

Sp vil gradvis redusere elbilfordelane. Kjøper du ny elbil, skal du betale avgift for summen som overstig 600.000 kroner. Partiet vil i løpet av ti år bygge ut 10.000 nye hurtigladarar i heile landet.

SV vil at alle nye bilar skal vere utsleppsfrie om to år. Nye elbilar skal betale avgift for summen som overstig 600.000 kroner. Partiet vil også gi meir pengar til å bygge ut hurtigladarar i distrikta.

Venstre vil halde på elbilfordelane i fire år til og bygge fleire ladestasjonar i distrikta. Målet er at alle nye bilar skal vere utsleppsfrie i 2025. Venstre vil også at elektriske fritidsbåtar skal ha same fordelar som elbilar.

KrF vil at det skal løne seg å kjøpe elbil framfor fossilbil. Innan fire år skal alle nye bilar vere utsleppsfrie. Burettslag og sameige skal få støtte til å sette opp ladestasjonar.

MDG vil at alle nye bilar skal vere utsleppsfrie innan to år, og at det skal vere eit samanhengande ladenettverk i heile landet. Elbilfordelane skal haldast på heilt til elbilane er konkurransedyktige.

Raudt vil at det framleis ikkje skal vere avgift for rimelege elbilar. Dei som kjøper dyrare elbilar skal betale avgift for summen som overstig eit makstak. Dette taket er ikkje sett i partiprogrammet. Raudt vil bygge ut hurtigladarar i alle kommunesenter i landet.