|
Himlingen er måla etter Blix sin smak. |
Kyrkja var mykje til nedfalls då arkitekt
Peter Andreas Blix kjøpte kyrkja i 1880, og restaurerte den etter sin eigen smak. M.a. fekk den høgare kyrkjetårn, ny takkonstruksjon og ei svært spesiell dekormåling innvendes. I Hove-kyrkja vart det i 1878 funne restar etter gamal dekormåling. Men Blix tok ikkje omsyn til dette, og måla m.a. korhimlingen som ein sterkt blå himmelkvelving med stjerne, sol og måne. Då han døydde i 1901, vart Blix gravlagt under ei marmorplate i kyrkjeskipet.
|
Altaret under tårnet er skilt frå kyrkjeskipet med høge jarndører. |
Både til Hovekyrkja og seinare
Hopperstad stavkyrkje engasjerte Blix byggmeister
Jon Ivarson Hove til å leie arbeidet. Hove fekk i åra som fylgde, i oppdrag av Fortidsminneforeningen å restaurere ein mengde middelalderkyrkjer over heile landet.
Mellomalder-altar
|
Blix utstyrte kyrkja med dette krusifikset. |
I klebersteinsaltaret frå mellomalderen er det eit holrom som vart nytta til oppbevaring av relikviar. I kyrkjetårnet heng klokka frå 1694. Elles rydda Blix ut mykje av det gamle inventaret, og utstyrte kyrkja med nytt krusifiks over korbogen og eit biletteppe av
Kjerstina Vangsnes. I korveggen pryda Blix vindauga med glasmåleri, og ute på kyrkjeveggen har hestane som vart nytta til å køyre stein til restaureringa, fått si takk for hjelpa med ein liten klebersteinskulptur som er innfelt i veggen.
Hove-madonnaen
|
(Foto: Arild Nybø, NRK) |
Den gullforgylte Madonna med barnet frå Hove-kyrkja er eit av dei vakraste og best bevarte kunststykka frå norsk mellomalder. Den er truleg laga i Bergen kring 1250, og vert rekna som eit hovudverk frå denne tida. Hove-madonnaen er ein av juvelane i kyrkjesamlinga ved Bergen Museum. Der er det også teke vare på eit beslag til eit krusifiks frå 1200-talet, og ein biletvev frå 1888 laga av
Kjerstina Vangsnes som Blix kjøpte som dekor til kyrkja.
Ein altarduk frå ca. 1700 er å finne i Kunstindustrimuseet i Oslo. I Vik er ein preikestol frå 1670 teken vare på, og det same er altartavla frå 1686.
|
Hove kyrkje før Blix fekk bygt høgare tårn av stein. (Teikning © Riksantikvaren) |