SE OGSÅ:

KrF har ikkje svart

ALT OM:

Val 2005 Kristeleg Folkeparti Val 2005 i Sogn og Fjordane Kampen for lokalsjukehusa

Av Per Kristian Grimeland

Ein audmjuk Per Steinar Osmundnes, 1. kandidat for Krf ber i dag om orsaking, men understrekar at dei støttar kampen for lokalsjukehusa fullt ut. Han seier han har sendt svar der han imøtekjem spørsmåla frå sjukehusaksjonistane.

Var skuffa

I går sa Folkebevegelsen for lokalsjukehusa at dei var skuffa over at mange av stortingskandidatane ikkje hadde svart på brevet dei hadde sendt med spørsmål om kvar dei stod i spørsmålet om lokalsjukehusa.

Bomma på datoen

Eit av partia det blei reagert mot var altså Kristeleg Folkeparti. 1. kandidaten seier han bomma på datoen, og heller ikkje 2. kandidaten har hatt særleg orden i sysakene. Trude Brosvik seier ho rett og slett hadde forlagt og gløymt heile brevet.

- Ikkje i skvis

Men Brosvik og Osmundnes avviser i dag at forgløymingane og datorotet skuldast at dei har kome i ein skvis mellom kva partiet meiner lokalt og i regjering.

- Absolutt ikkje, eg trur at dei som har jobba med lokalsjukehusa i Sogn og Fjordane har sett at eg og KrF er til å stole på, seier Osmundnes.

Kan gi garantiar

I brevet kravde Folkebevegelsen garantiar for akuttberedskap, fødetilbod og folkevald styring over sjukehusa. og det er garantiar Osmundnes i dag ikkje har problem med å gi.

- Det er ikkje problem for meg å stille meg bak desse garantiane som dei ber om. Vi er opptekne av å sikre ein fullverdig akuttberedskap, og vi ønskjer så mykje ressursar ar vi kan oppretthalde lokalsjukehusa i Sogn og Fjordane og også sentralsjukehuset i Førde, seier han.