Av:
Vidar Vie
Men det er fleire politikarar som har grunn til å bite negler. På målinga, som vart gjennomført mellom 8. og 10. september, får Høgre berre 7,6 prosent av røystene. Det er nesten fem prosent under oppslutnaden for fire år sidan. Samtidig er det ein tilbakegang på 2,5 prosentpoeng frå målinga som vart gjort i august.
Heller ikkje venstrevinden ser ut til å ha slått til i Sogn og Fjordane. Gunvald Ludvigsen får 3,5 prosent oppslutnad, og det er ein tilbakegang frå dei siste målingane.
Osmundnes på veg opp
Det einaste regjeringspartiet som går framover er KrF, og dei får 11,5 prosent oppslutnad på BT-målinga. Det er ein framgang på fire prosent i høve til målinga som vart gjort i august. Per Steinar Osmundnes er med andre ord i siget, sjølv om det er langt fram til valresultatet på 16,3 prosent for fire år sidan. Men det er verd å merke seg at KrF går like mykje fram som Høgre går tilbake.
Sikkert FrP-mandat
Åge Starheim liknar stadig meir på den første FrP-representanten frå Sogn og Fjordane. Partiet får 15,7 prosent oppslutnad, og har aldri tidlegare vore så stort tett oppunder eit val.
Det er likevel ein tilbakegang på 1,8 prosentpoeng i høve til augustmålinga. Spørsmålet er om Starheim opplever det forgjengarane har gjort; at veljarane går til andre når det blir alvor.
Tett for Grande Røys
Stortingsrepresentant Heidi Grande Røys og SV får 12,2 prosent på målinga. Det er tett på valresultatet for fire år sidan, og det er tett på dei tre siste målingane som er gjennomførte for BT. Det betyr kort og godt at ho får ein svært spennande valkveld.
I følgje målinga kjempar ho med andrekandidaten til Ap, Ingrid Heggø. Ap får 25,1 prosent oppslutnad på målinga. Det er ein tilbakegang på 1,7 prosentpoeng i høve til augustmålinga.
Fram for Sp
Det nest største partiet er Senterpartiet som går fram 1,8 prosentpoeng i høve til siste målinga og endar på 20,9 prosent. Både dei og Ap har ambisjonar om to mandat på Stortinget.
I følgje målinga er Reidar Sandal (Ap), Liv Signe Navarsete (Sp) og Åge Starheim (FrP) i langt best posisjon til å hamne på tinget. Heidi Grande Røys, Per Steinar Osmundnes og Ingrid Heggø kjempar om det fjerde mandatet, medan det er uråd å spå kvar utjamningsmandatet vil hamne.