Hofslund Hotell

Næss-folka kom frå Romsdal, der dei hadde bygt og drive Halsa Hotell i øvre Romsdal. På Hofslund bygde Næss i 1912 det gamle gjestgiveriet og tingstova inn i eit nytt hotell aom fekk fasadar i sveitsarstil. Hotellet hadde i starten 34 senger.

Første rutebilen i Sogn. (Foto © Fylkesarkivet)

Skipa automobilselskap

Hotelleigaren Peder J. Næss gjekk også i brodden for å få skipa Indre Sogn Automobilselskap i 1916 (sjå: Den første rutebilen i Sogndal), og vart medeigar i Jostedalsbreens turisthotell som vart bygt på Elvekrok kring 1920.

Dreiv også i Luster

I 1918 dreiv Anna og Peder J. Næss også Tørvis hotell i Marifjøra, som på den tida var eigd av Anna sin familie. Drifta av dette hotellet overlet dei til sonen Hans Bugge Næss og ektemaken Brita. Næss var også ein av grunnleggjarane av Sogndal Cementindustri L/L.

Gjester klar til avreise frå Hofslund hotell. (Foto © Fylkesarkivet)

Sviggum utvidar

Frå 1926 dreiv tre døtre til Næss, Ranveig, Anna og Guro, hotellet fram til 1936, då Melchior Sviggum, gift med Ranveig Næss, kjøpte hotellet. I 1962 vart Hofslund Hotell utvida, og med seinare utvidingar har hotellet i 2003 96 senger senger og m.a. fleire møterom og symjebasseng.

I 1982 overtok sonen Tore Sviggum Hofslund Hotell, og frå 2002 er det brordotter til Tore, Mona Sviggum og ektemann Leif Johnsrud, som eig og driv det tradisjonsrike familiehotellet ved sjøkanten på Hofslund.