No like før jul er det julebaksten som fyller radioprogrammet "Mat med Mindor" - og ikkje berre dei vanlege sju sortane!
Videseterkjeks
Thorill Nilsen i Volda fortalde oss om den vidgjetne Videseterkjeksen, som har lange tradisjonar frå Videseter hotell i Stryn. Kjeksen blei vanlegvis brukt attåt ettermiddagskaffien, og skal vere svært god. Her er oppskrifta:
2 koppar lettkokte havregryn
1 kopp rosiner
1 kopp malne mandlar
1 kopp kveitemjøl
1 kopp smelta margarin eller smør
1 kopp sukker
1 ts kanel
1 ts nellik
1 ts natron
6-7 ss fløyte
Rør alt i hop i ein bolle. Legg kjeks-emna på smurt plate eller bakepapir med ei teskei. Ikkje legg dei tett - dei flyt utover. Steik dei i om lag 20 minutt ved 180-200 grader. La dei kolne og stivne på plata før du tek dei av, så blir dei heilt sprø.
Mandelmakronar og andre gode idéar
Helge Mjelve frå Molde gav oss mange gode idéar i "Mat med Mindor" 8. desember. Mjelve fortalde at han lagar fattigmann av 18 egg, av dei tre heile egg og 15 eggeplommar. Kva gjer han så med dei 15 eggekvitane? Jau, han lagar kokosmakronar, men for at det ikkje skal bli eit enormt lager av kokosmakronar, brukar han ein del av eggekvitane til mandelmakronar! Mandlane raspar han, men før det skåldar han dei og lar dei omnstørke i ein time ved ca. 130 grader. (Dei skal vegast før dei tørkar) Legg du denne massen i frysaren, blir han seig og eignar seg til tårnkake!
Elles meiner Mjelve at namnet "fattigmann" må komme av at den som baka han blei fattig i ei tid då råvarene var forholdsvis mykje dyrare enn i dag. Mjelve har rekna ut at i dag kostar ein fattigmann du bakar sjølv 26 øre stykket - då reknar han ikkje med det straumen kostar.
Mjelve har også laga solsikkemakronar av solsikkefrø, vanilje og melis, men solsikkefrøa bør stå til kjøling før du køyrer dei i mandelkverna, elles oljar dei seg...
Tips andre om denne saken
Utskriftsvennlig versjon