To svært ulike rettar - den eine kan lagast på eit par timar, den andre treng eit par år!
Mat med Mindor
Dette radioprogrammet kan du høyre i NRK Møre og Romsdal kvar formiddag mellom kl. 11.30 og 12.00. Programmet frå 7. april kan du høyre ved å klikke på lydlenkja ovanfor.
Der fortel Lars Kaggerud om
gammelsei -
ein rett som gir mange intens nyting (ca. 2 minutt ut i programmet)
Margit Dalseth snakkar om sekkjepose (ca. 9 minutt)
Rolf Lange fortel om den årlege sekkjeposefesten i Vistdal (14.30)
Arne Ola Grimstad i Ørsta har meir å fortelje om gammelsei (17.15).
Sekkjepose
Sidan sekkjepose er ein rett som ser ut til å ha Vistdalen som heimstad, skal vi ta med ei oppskrift på den. Retten skal kokast i spesielle posar som du kan få kjøpt i slakteriforretningar. Det går visstnok også an å bruke lerretsposar.
Slik lagar Margit Dalseth sekkjepose:
Om lag 1 kg potet
250 g spekekjøt (lam/sau)
250 g lettsalta sideflesk
Somme brukar spekemorr. Kjøtdeig kan også blandast i. Her må ein la sin eigen smak råde!
Salt og pepar
(Somme brukar litt timian, ein kan også ha ein løk oppi.)
Nokre matskeier byggmjøl og kveitemjøl.
Mal poteten og kjøtet saman. Somme vil helst ikkje male spekekjøtet, men skjere det i bitar. Røra skal vere litt lausare enn ballrøre. Fyll farsen i posar, legg dei i kokande, lettsalta vatn og la dei trekkje i 1 til 1 1/2 time.
Attåt kan du servere kålrot og gulrot og smelta smør - ekstra godt blir det dersom du har steikt litt spekekjøt i smøret. Baconfeitt går også bra.
Blir det noko til overs, kan du skjere sekkjeposen i skiver og steikje neste dag.
Margit Dalseth fortel at i hennar oppvekst i Eresfjorden var sekkjepose å rekne som kvardagsmat. No er det nok meir blitt festkost.