Partiet Høgre har i Rogaland gått frå å vera valvinnar med 22,7 prosent oppslutning i sist Stortingsval, til å vera ein av taparane med 15,9 prosent i den siste lokale meiningsmålinga før valet. Samstundes sprett Venstre opp frå 4,2 til 5,9 prosent og overtar sistemandatet frå Senterpartiet.
Av
Ingvald Nordmark
Arbeidarpartiet ligg på eit trygt og høgt nivå i Rogaland. Dei har 24,1 prosent på siste målinga som Stavanger Aftenblad og Haugesunds Avis presenterer den 9. september. Det betyr at Tore Nordtun, Eirin Sund og Torfinn Opheim er klare for «tinget».
Rekord for Frp
Framstegspartiet ligg også an til å gjera eit rekordvalg. Dei var godt nøgde med 18,2 prosent sist gong. Nå får dei 23,5 prosent og dei har stabilisert seg over 20 talet. Førstekandidat Øyvind Vaksdal frå Karmøy får med seg Solveig Horne Kolnes frå Sola og Kjetil Solvik-Olsen frå Stavanger.
Høgre er skuffa
Høgre, saman med Senterpartiet, er mest skuffa etter målinga. Høgre går ned frå tre til to representantar, og det er langt igjen før den tredje, Siri Meling, kan spasera opp Løvebakken. Dei var største parti i 2001 i Rogaland med 22,7 prosent. Nå er dei på tredjeplass i fylket, og dei er nede på 15,9 prosent. Dei lek til Venstre, etter fokuset på at dei borgarlege kan få mange «gratisrepresentantar», dersom Venstre kjem over sperregrensa på fire prosent på landsbasis. Foreløpig er berre Bent Høie og tidlegare Haugesunds-ordførar Finn Martin Vallersnes klare.
Meltveit Kleppa kan vera ute
Senterpartiet misser sin representant, Magnhild Meltveit Kleppa, dersom 5,3% blir det endelege resultatet. Men ho har vore i hardt vær før. Sist val kom ho inn på utjamningsmandat. I tillegg har ho eit godt namn i Senterpartikretsar og ho har bak seg tre periodar på Stortinget, deriblant også ei tid som sosialminister i Bondevik 1-regjeringa. Kleppa plar koma på oppløpssida og karra seg med til Stortinget.
Stabile i KrF
Kristeleg Folkeparti klarer seg godt i valkampinnspurten. Rett nok viser målinga ein kraftig nedgang frå sist val. Då fekk dei 19 prosent, nå har dei 13,7. Men dei ligg stabilt mellom 12 og 14 prosent i dei siste målingane og det er omlag der KrF pleier å vera i eit av deira beste fylke. Dagfinn Høybråten og Bjørg Tørresdal er klare for nye periodar.
Langeland fortsatt aleine
Hallgeir Langeland er hittil den einaste for SV, som kjem inn frå Rogaland. 8,7 prosent er ein tidel mindre enn dei fekk for fire år sidan. Dei har lege høgare på målingane tidlegare i år, men dei merkar slitasjen i Rogaland, som dei gjer i resten av landet.
Kvassheim utanom utjamningsmandata
Venstre kan få inn ein kandidat direkte her i fylket. Det er langtfrå sikkert, for tidlegare i år har dei lege på 4-talet. Denne gongen spratt dei opp i 5,9 prosent. Det kan bety at hjelpa frå den nye vallova gjer sitt. Fleire høgt profilerte personar har den siste tida fokusert på at dersom Venstre kjem over sperregrensa på fire prosent på landsbasis, så vil utjamningsmandatsystemet gi Venstre og dei borgarlege 4-5 ekstra representantar på Stortinget. Dersom framgangen held seg, kjem ikkje nokon av dei frå Rogaland. For då er Gunnar Kvassheim inne som vanleg distriktsmandat.