Utviste spelarar i treningskampar har vorte eitt heitt tema for dei lokale laga i det siste. Rob Friend vart utvist mot Hødd nyleg, og det er framleis uklart om han må stå over serieopninga mot Tromsø. Molde har anka saka, og reknar med å få ein del svar i løpet av veka.
|
Kanadiske Sandro Grande hadde ein fin debut i MFK-trøya. Foto: Gunnar Sandvik |
Mot Aalesunds FK debuterte Sandro Grande for MFK. Han gjorde ein fin figur som defensiv midtbanespelar. Dermed har Molde funne ein erstattar for Magnus Kihlberg. Grande kom frå Viking laurdag og debuterte altså søndag då han kom inn for Petter Rudi tretti minutt ut i kampen.
Men det var Madio Konate som stal showet. Han laga 1-0 til Molde etter eit flott raid der avslutninga gjekk via svenske Mattias Nylund og i mål. AaFK utlikna før pause då Erlend Holm vart felt, og Dede Anderson sette inn straffesparket.
Ikkje lenge etter måtte AaFK sin målscorar forlate kampen då han etter ein duell vart sint på Toni Kallio og nærast slo til Molde-spelaren så han hamna i bakken. Dermed direkte raudt kort til brassen, som kanskje må stå over serieopninga på grunn av dette. Også Mattias Nylund vart utvist i ein etter kvart ganske så amper kamp då han fekk to raske gule kort etter pause.
AaFk meinte at også Marcus Andreasson burde ha fått raudt kort då Lasse Olsen vart dytta mot slutten av kampen. TV-bilde viser likevel at dette neppe kvalifiserte til raudt kort.
Molde avgjorde kampen då Madio Konate krangla inn 2-1 i 2.omgang. Den same Konate hadde mange sjansar til å auke Molde si leiing. Molde vann fullt fortent, men 2-1 over eit AaFK-lag som avslutta kampen med ni mann er ikkje direkte imponerande to veker før seriestart. Komande søndag spelar Molde generalprøve mot Brann, kanskje på Molde stadion. AaFK spelar heime mot Tromsø fredag, og borte mot Hødd søndag.
|
Domaren måtte dele ut to raude kort til Aafk-spelarar. Foto: Roar Strøm NRK |