Den nye Molde-trenaren har målet klart: Han vil ha MFK tilbake til toppen av norsk fotball. I ettermiddag kom Bosse Johansson til Molde.
- Eg lovar ikkje samba-fotball med ein gong, seier Bosse Johansson til NRK Møre og Romsdal. Det er for ideelt og for lett å berre ønske at vi skal spele som brasilianarane. Ein må rette seg etter dei tilhøva som fins, seier han.
|
Bosse Johansson kom til Molde i ettermiddag. Foto: Omar Sejnæs, NRK. |
Kjenner Molde
Moldes nye trenar har ein karriere som få andre å vise til.
Toppen var EM-og VM-sluttspel med det danske landslaget.
- Eg veit kanskje ikkje så mykje om MFK, men eg veit ein del, seier han. Eg har sett dei spele kvart år i det siste. Som trenar for Gøteborg har eg også møtt MFK, ja eg har til og med tapt for dette laget.
Demokrat
På spørsmål om kva slags trenartype Bosse Johansson er, svarar han at han er ein demokratisk trenar, som snakkar mykje med spelarane og som lyttar mykje til dei. - Eg lyttar også mykje til menneska i miljøet kring klubben, og eg legg stor vekt på det sosiale, seier han til NRK Møre og Romsdal.
Kamp i morgon
I ettermiddag landa Bosse Johansson på Årø, og blei presentert for media på ein pressekonferanse. Alt i morgon får han sjå kva laget er godt for. Då møter MFK Sogndal til treningskamp i Midsund.