Molde hadde tilsynelatande god kontroll etter 2-0 ved pause. Måla til MFK var likevel ganske billege. Daniel Berg Hestad sette inn sitt femte for sesongen då han sette inn ein retur frå keeper Kenneth Høie. Keeperspelet var ikkje mykje å skryte av, men Berg Hestad var der med ei lang tå.
Fredrik Gustafson laga 2-0 like etter då han fekk stå heil åleine inne i 16-meterfeltet. Han breisida ballen i det lengste hjørnet frå 12-13 meter.
Bryne utlikna
Etter pause kom Bryne inn att i kampen. Marcus Andreasson heada inn reduseringsmålet, medan innbyttar Dag Frode Hornseth utlikna etter ein fin prestasjon. På det tidspunktet trudde tilskodarane på Molde stadion at Molde skulle rote bort poenga, men Bernt Hulsker heada vakkert inn 3-2 etter innlegg frå Thomas Mork frå venstrekanten.
Tilskodartalet på Molde stadion var 4550, men dette er inkludert rundt 3000 sesongkort. Truleg var det langt frå alle desse som var der. Mest sannsynleg var det knapt 3500 tilskodarar på plass på eit stadion som tek over 11 000.