|
Ny sjanse for Odd Berg & Co |
Molde har hatt ein svært skuffande sesong så langt. I Tippeligaen er det berre eitt poeng som skil laget frå kvalifiseringsplassen, medan det i cupen vart exit allereie i 3.runde. Og det på heimebane for 1.divisjonslaget Skeid. No har Molde ein ny sjanse til å få ein opptur i år, i UEFA-cupen. For å vere med på moroa må Klaksvik frå Færøyane overvinnast.
Den første av to kampar går på Molde stadion torsdag kveld klokka nitten. Molde bør ikkje gå i den opplagte fella å undervurdere laget frå Færøyane. Sjøl om dette ikkje er det beste laget frå øya ute i havet.
Brei erfaring
Klaksvik har brei erfaring frå internasjonale kampar, og har deltatt i ulike UEFA-turneringar seks gonger, og spelt 12 kampar i turneringa tidlegare. På desse kampane har det vorte ein siger og ein uavgjort så langt. Landslaget til Færøyane har vist at det finst gode fotballspelarar på øya.
Klaksvik er no nummer fem på ligatabellen etter 12 spelte kampar. Laget har seks sigrar, to uavgjorte og fire tap.
I siste seriekamp på heimebane 10/8 vann Klaksvik 4 – 1 over EB/Streymur og angriparen Hjalgrim Elttør scora alle dei fire måla.
Klubben, KI Klaksvik er stifta i 1904 og har 100 års jubileum til neste år. Klubben har om lag 900 medlemmer og aktiviserer nesten 35 fotballag der også damelaget har gode resultat.
|
Frå Champions League i Molde. Ikkje heilt det same mot Klaksvik... |
Retur om 14 dagar
Returoppgjeret skjer på Færøyane torsdag den 28. august. Vinnarlaget samanlagt spelar 1. ordinære runde i UEFA cupen onsdag 24/9 og onsdag 15/10. Motstandarar vert trekte i Monaco fredag 29.august klokka 13:00.