Av politisk kommentator Bjørn Bø

NYKEL: Lars Sponheim og resten av venstre kan verte nykelen i valet, meiner Bjørn Bø. (Foto: Scanpix)

Blokkvekslinga no fire dagar for valet syner at det er daudt løp i kampen mellom dei to erklærte regjeringsalternativa.

Likevel er det eit symbolsk punkt at det raud-grøne fleirtalet er borte på desse to målingane. Fysst og fremst syner dette kor små marginar det er som skal til for å påverke eit valresultat. Det aukar spaninga framfor valet. Og det aukar stresset i dei ulike politiske læger.

Venstre i nykelrolle?

I fleire meiningsmålingar i det siste har der vore tendensar til at Venstre kan vera på veg opp over sperregrensa for utjamningsmandat. Eit Venstre over sperregrensa er truleg ein førestenad for ein eventuell borgarleg valsiger.

Men det er ikkje sikkert at det er nok i seg sjølv for dei borgarlege. Venstre har likevel fått mykje merksemd som nykelrolleparti i det siste. Dette har mellom anna skjedd ved at folk med tilgang til pengar har gjeve gåver til partiets valkamp. Dei har også oppmoda til taktisk røystegjeving på Venstre for å tryggje borgarleg fleirtal. Ein kan ikkje sjå bort frå at denne verksemda har verka med til å gje partiet eit puff.

Arbeidarpartiet

Den valvinden Arbeidarpartiet syntest å ha i ryggen tidlegare i valkampen har stilna. Partiet slit med å stabilisere seg på 30-talet når me tek gjennomsnitt av dei siste målingane.

Dette skjer etter at Jens Stoltenbergs valkamp har vore omtalt som vellukka. Det buttar imot. Og når dei raud-grøne partnerane ligg heller smålåte til, blir kampen om regjeringsmakta tyngre. No må me heile tida ha for auge at der er feilmarginar knytte til funnna for dei einskilde partia. Men tendensen for Arbeidarpartiet er mindre positiv enn for berre nokre dagar sidan.

Sv strevar

Meiningsmålingane har blafra noko for SV. Men hovudtendensen er at det går heller tungt. Og i valkampen har partiet streva.

SV har kome i skuggen av storebror Arbeidarpartiet. Dessutan har SV for fysste gong stått fram som eit ansvarleg parti med ambisjon om regjeringsmakt. Dermed har partiet også stått fram med ein kompromissvilje som nok er uvant for mange av tilhengarane.

Borgarlege vanskar

Dei siste meiningsmålingane er ikkje hyggeleg lesing for dei raud-grøne. Men det er ikkje berre solskin i meldingane for den ikkje-sosilistiske sida heller.

For det er framleis Framstegspartiet som er lokomotivet på den sida. Så lenge Carl I Hagen står fast på at han vil fjerne Kjell Magne Bondevik som statsminister om det blir borgarleg fleirtal på nytt, er uvissa om framtida stor for regjeringspartia.

Dessutan - om valresultatet skulle bli så jamnt som dei siste målingane tyder på, kan fleirtalet for den eine eller andre parten bli avgjort av småparti som RV og Kystpartiet. I alle fall teoretisk.

(NRK)