Ho var grådig på livet, nysgjerrig, full av lykke og sorg. Og ho forelska seg stadig i nye menn. Diktaren Inger Hagerup ville utforske livet 24 timar i døgeret - året rundt.
Den 12. april er det eit 100 år sidan forfattaren Inger Hagerup vart fødd. Sonen hennar Klaus Hagerup har skreve biografien "Alt er så nær meg" om mor si:
- Eg har mange gode minner frå barndommen. Mor brukte å lese for meg på sengekanten. Ho utstråla ein menneskeleg varme som også vart oss borna til del. Og ho var oppteken av at eg og bror min skulle ha ein normal barndom, sjølv om vi hadde ei mor som var kunstnar. Difor spiste vi middag og kvelds til bestemte tider kvar dag, fortel sonen Klaus Hagerup.
|
Oslo 1958: Forfatteren Inger Hagerup foran sin skrivemaskin sammen med sin katt. Foto: Aage Storløkken / Aktuell / Scanpix |
Men barndomsminna til Klaus Hagerup er ikkje berre hyggelege. Når mora drakk for mykje vart han engsteleg. Festane med kunstnarvener i barndomsheimen på Haugerud var vidgjetne. Og spøkefullt har det blitt sagt at Klaus Hagerup vokste opp under eit bord på Theatercafeen.
- Eg vil ikkje seie at Inger Hagerup var ei trygg mor, men ho var ei god mor, seier Klaus Haugerup.
Ujevne dikt
Som lyrikar synest han dikta til Inger Hagerup er ujevne.
- På sitt beste er dikta hennar glitrande; Nakne i uttrykket og enkle, direkte i formen. Med dikt som "Austvågøy" og "Vær utålmodig menneske" vart ho forveksla med Arnulf Øverland, fortel sonen Klaus Hagerup.
Klikk på lenka i medieboksen for å høyre innslaget som vart laga av Kjetil Lillesæter og sendt i Norgesglasset NRK P1.
Les mer om Inger Hagerup
Lagt til rette for Internett av Per Kristian Johansen.