Hødd-trenar Stig Monsen reagerer sterkt på at AaFK har avtalt å spele mot Tromsø berre to dagar før Hødd og AaFK skal møtast til generalprøve før seriestart.
Oppgjeret mellom Hødd og AaFK søndag 2.april er avtalt for lenge sidan, men etterpå har AaFK booka inn ein kamp mot Tromsø 31.mars. Det er i strid med det Hødd og AaFK var samde om, seier Monsen.
Dei beste
I generalprøva blir det venta at begge laga stiller med dei beste spelarane sine. Det er det eit ope spørsmål om Aalesund kjem til å gjere mot Hødd når laget skal møte tippeligalaget Tromsø berre to dagar før. AaFK-trenar Per Joar Hansen vil ikkje kommentere kritikken frå Hødd. Han vil heller ikkje seie kvifor AaFk har valt å spele mot Tromsø to dagar før kampen mot Hødd.
|
Henrik Hoff (Foto: Gorm Kallestad/Scanpix |
Dagleg leiar i AaFK, Henrik Hoff, seier at det er blitt litt mange kampar mot Hødd, og at trenarane ønskte også andre motstandarar. Derfor har AaFK avtalt å spele heimekamp mot Tromsø 31. mars, og dei skal greie å stille gode lag på begge kampane, seier Hoff.
Hødd skeptisk
Stig Monsen i Hødd har inga tru på at AaFK stiller med sitt beste mannskap i begge kampane, og det er det Hødd som får svi for, meiner han.