Valgerd Svarstad Haugland og Knut Arild Hareide misser statsrådspostane sine, og ser heller ikkje ut til å kome inn på Stortinget.
Av
Bent J. Tandstad
KrF
Kulturminister Valgerd Svarstad Haugland er tidlegare partileiar for KrF, og var førstekandidat for partiet i Akershus. No er veljarane sin dom klar. Ho må finne seg ein annan jobb i løpet av hausten.
|
Knut Arild Hareide har ikkje plass i det nye Stortinget. (NRK-foto) |
Parti- og regjeringskamerat Knut Arild Hareide kjem heller ikkje inn på Stortinget frå Hordaland. Han stod på tredjeplass på lista, etter Ingebrigt Sørfonn og barne- og famiieminister Laila Dåvøy, som begge kjem inn på fast plass i det nye Stortinget.
|
Laila Dåvøy held fram på Stortinget. |
Statsminister Kjell Magne Bondevik var ikkje kandidat til Stortinget, og har gjort det klart at om han ikkje vart statsminister, så er det farvel til politikken. Ein jobb i ein internasjonal humanitær organisasjon er eit mogleg jobbval for den erfarne politikaren.
|
Dagfinn Høybråten held fram på Stortinget. |
Arbeids- og administrasjonsminister Dagfinn Høybråten er attvald til Stortinget frå sitt nye heimfylke Rogaland, og skal kombinere stortingsplassen med vervet som partileiar i Kristeleg Folkeparti.
Utviklingsminister Hilde Frafjord Johnson var ikkje kandidat til Stortinget, og står utan jobb når regjeringa går av. Dei fleste tipsa går i retning av ein toppjobb i FN eller ein annan internasjonal organisasjon.
Høgre
|
Erna Solberg skal leie Høgre frå Stortinget. |
Kommunalminister og partileiar i Høgre, Erna Solberg, fekk fornya tillit på Hordaland-benken, og skal leie partiet vidare frå opposisjon på Løvebakken.
Forsvarsminister Kristin Krohn Devold (H) tok ikkje attval til Stortinget, og det er uklart kva ho skal ta til med når venteløna frå regjeringa går ut.
Utanriksminister Jan Petersen (H) og næringsminister Børge Brende er begge innvalde for ein ny periode på Stortinget.
|
Per Kristian Foss held fram på Stortinget. |
Finansminister Per Kristian Foss skal også halde fram på Stortinget.
Olje- og energiminister Torhild Widvey kom til regjeringa frå ei stilling i Utanriksdepartementet. Ho var først statssekretær, og vart deretter statsråd. Ho har ikkje plass på Stortinget.
Helse- og omsorgsminister Ansgar Gabrielsen sa nei til attval på Stortinget, så det er uklart kva han skal gjere når han har levert frå seg nøkkelen til departementet.
Fiskeriminister Svein Ludvigsen er alt utnemnd til fylkesmann i Troms.
|
Morten Andreas Meyer har ikkje plass på Stortinget. |
Moderniseringsminister Morten Andreas Meyer har ikkje stortingsplass, og går truleg tilbake til den gamle jobben sin som konsulent for næringsliv. Han har også vore varaordførar i Hamar kommune.
Venstre
Landbruksminister Lars Sponheim har leidd partiet sitt til eit brakval, og han vart attvald med god margin til Stortinget.
|
Lars Sponheim held fram på Stortinget. (Scanpix-foto) |
Justisminister Odd Einar Dørum fekk også fornya tillit på Stortinget, der også parlamentarisk leiar Trine Schei Grande vart innvalt frå Oslo.
Ho var inne på Stortinget også i siste periode, men då var ho berre vararepresentant som møtte fordi Odd Einar Dørum var i regjeringa.
Samferdsleminister Torild Skogsholm kom til regjeringa frå ein toppjobb i mobiltelefonselskapet Netcom. Ho har ikkje fått plass på Stortinget, så ho hamnar nok i det private næringslivet igjen.