Av
Bent J. Tandstad
Når nesten 100 prosent av røystene er opptalde, er det ikkje eit fnugg av tvil. Det blir ei raud-grøn regjering med Jens Stoltenberg som statsminister.
87-82
Dei tre partia, Arbeidarpartiet, Sosialistisk Venstreparti og Senterpartiet, vil få 87 representantar på Stortinget. Dei borgarlege, inkludert Framstegspartiet, hamnar på 82.
Den sitjande regjeringa og statsminister Kjell Magne Bondevik står igjen som den store taparen.
|
Carl I. Hagen hadde all grunn til å juble i natt. (Foto: Morten Holm/Scanpix) |
Av dei tre regjeringspartia, Høgre, Kristeleg Folkeparti og Venstre, er det berre Venstre som har grunn til å juble, men berre litt.
For Venstre sine veljarar kjem i stor grad frå dei andre regjeringspartia, og partiet er ikkje lenger i regjeringsposisjon.
- Eg gler meg til å bli statsminister. Mest fordi det er ein meiningsfylt og viktig jobb, og fordi det er viktig for meg å trekkje Noreg i rett retning, seier Jens Stoltenberg.
Alt i natt var det eit møte mellom Jens Stoltenberg, Senterpartiets Åslaug Haga og SV-leiar Kristin Halvorsen. I løpet av kort tid vil det kome i gang reelle forhandlingar om å danne ei ny raud-grøn regjering.
Skuffa
Kristin Halvorsen er den med minst grunn til å juble av dei tre partileiarane som no skal danne regjering saman. Ho er skuffa over at partiet har mist åtte stortingsrepresentantar i forhold til valet i 2001. I det nye Stortinget vil SV ha ei gruppe på 15 representantar.
|
Ikkje berre glede for Lars Sponheim, trass i brakvalet for Venstre. (Foto: Heiko Junge/Scanpix) |
For Jens Stoltenberg og Arbeidarpartiet er valet eit historisk comeback. For første gong på lenge ser partiet igjen 30-talet, og i morgontimane i dag ligg Ap på 32,7 prosent av røystene. Det gir 62 representantar på Stortinget, ein auke på 19 frå inneverande periode.
Ved det historisk dårlege valet i 2001 fekk Ap berre 24,3 prosent av røystene, og partiet er no på veg tilbake der dei var på midten av 90-talet.
Senterpartiet og Åslaug Haga har også gjort eit solid val, men det er langt frå noko brakval. 6,5 prosent av røystene, mot 5,6 prosent for fire år sidan. 11 stortingsrepresentantar, mot 10 i dag.
Framstegspartiet
Dei tre noverande regjeringspartia er no berre så vidt større enn det klart største opposisjonspartiet, Framstegspartiet.
Partiet til Carl I. Hagen held fram den sterke framgangen partiet har hatt ved dei siste vala, og med 22,1 prosent av røystene har partiet god grunn til å sleppe jubelen laus. Det gir 37 representantar på Stortinget, mot 26 i dag.
Det store spenningsmomentet blir om den uforsonlege tonen mellom Kristeleg Folkeparti og Framstegspartiet vil halde fram også etter at Kjell Magne Bondevik si tid er ute, og om vi vil sjå ei tilnærming mellom Høgre og Framstegspartiet.
|
Frå venstre Kristin Halvorsen (SV), Jens Stoltenberg (Ap) og Åslaug Haga (Sp) på Stortinget i natt. (Foto: Tor Richardsen/Scanpix) |