OM ØYSTRE SLIDRE KOMMUNE
Øystre Slidre er ei langstrakt fjellbygd lengst nord i Valdres. Rundt 3100 personar bur her fast i året, mens innbyggjartalet blir mangedobla i dei hektiske turistmånadene. Beitostølen-området er i dag hovudnæringa i kommunen og gjev store ringverknader. Elles er landbruk og offentleg sektor ein stor arbeidsgjevar.
Blant dei som ofte blir trekte fram når ein skal omtale kommunen er Beitostølen Helsesportssenter, der Anna og Erling Stordahl var viktige bakspelarar.
POLITISK SITUASJON
Ove Sverre Skaret frå Arbeidarpartiet vart ordførar ved siste val, etter at Sps Ola Fjelltun ikkje nådde opp i kampen om vervet. Fjelltun hadde vore ordførar i to år ved siste val. Venstre har elles ein sterk plass i kommunestyret, med aktive politikarar som set spørsmålsteikn ved kva dei leiande partia fører av politikk.
AKTUELLE SAKER
For fyrste gong blir det truleg kvinneleg ordførar i Øystre Slidre. Både Arbeidarpartiet og Senterpartiet stiller med kvinner på topp. Frå Arbeidarpartiet kjem Gro Lundby og Bente Oxhovd stiller for Senterpartiet. Likevel kan det vere ein joker i dette spelet og namnet hans er Håkon Johs. Skarstad og representerer Venstre. Han er ein gamal politisk ringrev og kan for mange vere ein å ty til når dei andre er ukjende i politikartrøya.
Mykje av politikken handler om å seie noko om kor mykje utbyggjing ein skal tillate i Beitostølen-området. No byrjar reiselivet å sjå nærare på eit samband mellom Beitostølen om Raudalen-området i Vang i Valdres. Men meiningene er delte. Nokon meiner frisleppet er totalt, medan andre meiner politikarane legg stein for stein i området. Uansett er det mykje av dei administrative ressursane i kommunen som går med til planleggjing og tilretteleggjing for nye hyttetomter.
Det er eit aktivt næringsliv i kommunen og vel 120 av desse har organisert seg i en felles organisasjon. Desse verksemdene er og avhengig av at det blir lagt til rette for nye hytter, for arbeidsplassane er ofte tufta på kva feriefolket vil.
KOMMUNESTYRET 1999-2003
Rundt bordet i kommunestyret i Øystre Slidre er det 21 representantar. Ni av desse kjem frå Arbeidarpartiet. Seks kjem frå Senterpartiet, tre frå Venstre, to frå Høgre og ein frå Kristeleg Folkeparti