Frå nyttår av kostar det 600 kroner timen å få ein Enøk-ekspert heim i stova og gi sparetips. Med dagens prisar burde det framleis vere gratis å få råd om korleis ein kan spare straum, meiner SV. Men regjeringspartiet KrF forsvarar at statstøtta til Enøk-sentra blir fjerna.
- Det er alltid fleire som vender seg til oss når prisane går opp, seier informasjonsleiar Ingunn Grøtte ved Enøk-senteret i Sør-Trøndelag.
Ho fortel at dei fleste som vender seg til henne, spør om varmepumper og vedprisar. Men no kan ho ikkje lenger svare.
- Nei, no kan eg ikkje svare på slike spørsmål lenger utan å ta betalt for det, seier ho.
 |
| Heidi Sørensen (SV) |
- Dette burde vere gratis
- Dette burde absolutt vere gratis. Nabolanda våre er mykje flinkare enn oss til å gi folk råd om straumsparing, og dei unngår også lettare kriser i straumleveransane enn vi, seier Heidi Sørensen (SV).
Dersom du er ein av dei som har lyst til å lære å spare straum, er du seint ute. Etter nyttår kostar det deg seks hundre kroner timen å få besøk av ein enøk-ekspert.
 |
| No kostar det 600 kroner timen å få råd hos Enøk-sentra. |
Ikkje lenger gratis
- Før kunne du få gratis hjelp til å få vite meir om din eigen bustad. Du kunne til dømes komme hit med teikningar over huset ditt og finne ut om det var eigna for å installere varmepumpe. Men slike gratistilbod har vi ikkje lenger, seier teknisk sjef Jan Peter Amundal ved Enøk-senteret.
For kvar kilowattime straum du kjøper, blir det sett av 0,3 øre som skal brukast på å lære folk straumsparing. Før gjekk desse pengane til lokale Enøk-senter landet over. No går dei til statsforetaket Enova, som berre driv ein Enøk-telefon i Narvik.
Viss du ikkje får vite nok der, må du betale dyrt for å få ein konsulent på plass.
Vil satse alternativt
- Enøk-telefonen er eit godt nok tilbod. Folk må ta initiativ sjølv for å finne ut korleis dei skal spare straum, seier Bror Yngve Rahm (KrF) i Energi- og Miljøkomiteen.
 |
| - Folk må ta initiativ sjølv, seier Bror Yngve Rahm (KrF) i Energi- og Miljøkomiteen. |
Han meiner det er viktigare å satse på alternative energikjelder enn straumsparing.
Enøk-senteret i Sør-Trøndelag ser seg no om etter nye kundar. Dei kan ikkje gi råd til vanlege folk lenger, sjølv om Enøk-sentera er bygd opp på straumkundane sine pengar.
Satsar på bedrifter
- Vi trur ikkje privatkundar vil betale seks hundre kroner timen for råd. Difor kjem vi til å satse meir på bedrifter framover, for å overleve som selskap, seier Ingunn Grøtte.
Ho fortel at etter kvart som straumprisane har auka, er folk også blitt meir ivrig etter å spare. Då er det trist å ikkje lenger kunne gi kunnskapen sin gratis vidare til folk flest.
- Vi føler jo at vi har mykje kompetanse, og det er synd vi ikkje kan bruke den på alle kundar som ynskjer hjelp, seier Grøtte.
Tips andre om denne saken
Utskriftsvennlig versjon
