Arild Carlsen er spesialsjukepleiar på Sør Trøndelag psykiatriske sjukehus. Måndag sa han opp jobben sin. Etter det har han tatt seg fri for å organisera ein kampanje der målet er å få flest mogleg sjukepelaiarar til å seia opp jobbane sine.
Slik håpar dei å tøma den eine avdelinga etter den andre på sjukehusa. Då må sjukehusa gå til vikarbyrå for å få tak i sjukepleiarar, og slik håpar Arild Carlsen at resultatet blir høgare løn for dei som er tilsett på sjukehusa.
- Me er villige til kva som helst forå få betre løn, seier Arild Carlsen. Og kva som helst, det er å seia opp jobbane sine, og til dømes få seg jobb i vikarbyrå. For Arild Carlsen vil det bety ein lønnsauke på over 100 000 kroner i året. Og så kan vikarbyrået leiga han ut til eit sjukehus som manglar tilsette. Skilnaden for sjukehuset blir berre at prisen for Arild Carlsen blir nesten dobbelt så høg.
- Målet er eit godt offentleg helsevesen, seier Carlsen, men no vil han ha mange med seg for å ramma det same helsevesenet. I kveld skal han ha møte med 10-15 andre sjukepleiarar i Trondheim. Målet er å få dei også til å seia opp.
Han reknar med at aksjonen også spreier seg til Haukeland sjukehus i Bergen. Der reknar han med at dei første oppseiingane kjem neste veke.
Tips andre om denne saken
Utskriftsvennlig versjon
